Britania ka shtuar sanksionet kundër Rusisë, duke sanksionuar edhe 65 individë dhe subjekte të tjera në përgjigje të pushtimit rus të Ukrainës, sipas ‘Daily Mail’
Gjashtë banka të tjera janë vënë në shënjestër, duke përfshirë Alfa Bank, bashkëthemeluesit e së cilës përfshijnë oligarkët e sanksionuar më parë Mikhail Fridman, Petr Aven dhe German Khan. Prodhuesi më i madh në botë i diamanteve Alrosa është sanksionuar gjithashtu.
Në listën e Britanisë është edhe 26 vjeçarja Polina Kovaleva, thjeshtra e ministrit të jashtëm rus Serghei Lavrov, e cila jeton në një apartament luksoz në Londër.
Objektivi më i spikatur i sanksioneve është Polina Kovaleva e diplomuar në Imperial College, një 26-vjeçare magjepsëse që jeton në një shtëpi prej 4 milionë paund në Kensington.
Polina shkoi në një shkollë private me konvikt në Bristol përpara se të merrte një diplomë të klasit të parë në ekonomi me politikë në Universitetin Loughborough dhe më vonë të përfundonte një master në ekonomi dhe strategji për biznes në Imperial College London.
Ajo vazhdoi të punojë për Gazprom, gjigantin rus të energjisë, ku ndihmoi me bashkimet dhe blerjet dhe më vonë punoi në Glencore, kompania minerare. Para se të blinte shtëpinë e saj, ajo jetonte në Holland Park, në perëndim të Londrës, në një apartament në një shtëpi në qytet që është në pronësi të ambasadës ruse.
Gjithashtu ndër objektivat e masave të reja të shpallura sot janë mercenarët e Grupit Wagner – të njohur si “ushtria private e Putinit” dhe të akuzuar për përpjekje për të vrarë Volodymyr Zelensky dhe politikanë të tjerë të lartë ukrainas.
Ministrja e Jashtme Liz Truss e ka bërë të ditur lajmin përmes një njoftimi në Twitter, duke specifikuar se lista tani përfshin “më shumë se 1000 individë dhe kompani” që besohet se kanë lidhje me sistemin e pushtetit të Presidentit Vladimir Putin.
g.kosovari
