Një person i shpallur në kërkim për dhënie parash me fajde, është kapur në kufi nga policia e Hanit te Hotit. Në hyrje të Shqipërisë, gjatë paradites së sotme u bë ndalimi i 24-vjeçarit Endri Lesha 24 vjeç, banues në lagjen “Qemal Stafa”, Shkodër.
Ndalimi i tij u bë pasi Gjykata e Shkodrës, në 12 mars 2019, ka caktuar masën e sigurisë “Arrest në burg”.
I riu është shpallur në kërkim për veprën penale “Ushtrim pa licencë i veprimatrisë bankare me pasoja të rënda, e kryer në bashkëpunim” dhe “Pastrim i produkteve të veprës penale”.
Ndaj të dyshuarit materialet iu referuan Prokurorisë së Shkodrës për për veprime të metejshme.
Ai akuzohet se bashkë me një mikun e tij i kanë dhënë 43 mijë euro me fajde, Elton Radovanit, djalit të ish-prefektit të Shkodrës, Paulin Radovani.
I riu bën pjesë në hetimet e operacionit të koduar “Maranaj”, gjatë të cilit u godit një grup që jepte para me fajde.
Pas një hetimi disamujor u siguruan prova për 19 të dyshuar, për veprat penale të “Pastrimit të Produkteve të Veprës penale”, “Ushtrim aktiviteti financiar të palicencuar”, “Shpërdorim detyre”, “Prodhim dhe mbajtje pa leje e armëve luftarake dhe municioneve” dhe “Moskallëzim krimi”.
Gjatë hetimit janë krijuar dyshime të arsyeshme si dhe janë gjetur e sekuestruar prova materiale që hedhin dritë mbi aktivitetin e tyre kriminal.
Ndërkohë u ekzekutua masa e sigurisë “Pezullimi i ushtrimit të një detyre a shërbimi Publik” dhe “Detyrim paraqitje” për noteren Valbona Hajdari, A.S., nga Shkodra dhe efektivin e policisë Ergys Lohja.
Gjatë operacionit dhe kontrolleve u gjetën dhe sekuestruan në cilësinë e provave materiale 238 600 euro, 272 400 dollarë, 414 000 lekë, 510 Paund Britanik, 20 automejte transporti, një revolver, një krehër pistolete me fishekë; një armë gjahu pa leje; 5 kompjutera laptop; 50 celularë.
Gjithashtu u sekuestruan dokumente, kontrata, akte dhe deklarata noteriale, për pasuri e transaksione financiare të dyshuara.
