Gjykata e Shkodrës, në një seancë e cila ka zgjatur rreth tre orë, ka dhënë masën e sigurisë për katër të arrestuarit nga RENEA gjatë operacioni tre ditor, pas vrasjeve mafioze në kryeqendrën e veriut, ndërsa u sekuestruan edhe disa automjete luksoze të blinduara.
Ilir Bajri, Erogen Vaso (Bajroviç) dhe Emer Plaku janë lënë në arrest me burg 30 ditor, deri në mbërritjen e ekspertimit të Prokurorisë për armët e sekuestruara. Ndërsa për Asmer Bilalin jepet masë “arrest shtëpie” i mbikëqyrur nga Policia e Shtetit. Akuzat e prokurorisë janë për armëmbajtje pa leje dhe grup të strukturuar kriminal. Por dy akuzat e ngritura nga prokurorja Esmeralda Ndoci duket se nuk kanë bindur gjyqtaren Irida Kaceri e cila ka lënë në burg tre nga katër të arrestuarit vetëm për akuzën e armëmbajtjeve pa leje.
Pritet ekspertiza nga prokuroria per te pare gjurmët e plumbave te gjetur gjate kontrollit të banesave. Gjatë të njëjtit operacion u sekuestruan edhe katër automjete të blindura të cilat përdoreshin nga familjet Lici dhe Bajri. Pala mbrojtëse ka pretenduar gjatë seancës se arrestimi i katër personave është i paligjshëm si dhe kanë kërkuar heqjen e sekuestruar ndaj automjeteve luksoze.
a.ç
