Presidentja e Kosovës, Atifete Jahjaga, deklaroi sot se nuk mund të lejojmë që dialogu të imponohet me dhunë dhe demokracia të sfidohet çdo ditë, prandaj dialogu duhet jetë e vetmja rrugë që duhet ndjekur.
Në konferencën e pestë Gjyqësore të organizuar nga Këshilli Gjyqësor i Kosovës dhe të mbështetur nga Organizata për Siguri dhe Bashkëpunim në Evropë (OSBE), Misioni në Kosovë, presidentja Jahjaga tha se “qytetarët tanë kërkojnë më shumë nga ne, ata kërkojnë një drejtësi pa kompromis ndaj krimit të organizuar dhe institucioneve dhe ne duhet ta kthejmë besimin e qytetarëve tanë në sistemin e drejtësisë, duke bërë reforma dhe duke mos u ndikuar nga asnjë forcë politike”.
“Ne kemi forcë të luftojmë korrupsionin sepse askush nuk duhet të jetë mbi ligjin“, u shpreh Jahjaga.
“Kosova Press” shkruan se duke u ndalur te përkrahja e Kosovës në luftën ndaj terrorizmit, ku janë arrestuar disa persona të dyshuar, Jahjaha theksoi se kjo luftë nuk përfundon këtu dhe ne duhet të jemi më efektiv në parandalimin e ekstremizmit të dhunshëm.
“Kosova kurrë nuk ka qenë dhe nuk do të jetë vatër e terrorizmit, duke prishur harmonizimin fetar”, tha Jahjaga.
Kryetari i Gjykatës Supreme të Kosovës, Fejzullah Hasani, ne fjalën e tij theksoi se korrupsioni është humbja e shpresës për të ardhmen sepse pengon zhvillimin e rendit, atë ekonomik dhe cënon të drejtat e njeriut, pasi përmes korrupsionit jepet padrejtësia.
“Sistemi gjyqësor duhet pastrohet nga gjyqtarët dhe prokurorët e korruptuar me qëllim që gjyqësori të fitojë besimin e publikut”, tha Hasani.
