Sekretari i Përgjithshëm i Këshillit të Evropës Thornbjørn Jagland i ka dërguar një letër presidentit të republikës Bujar Nishani pas shqetësimit të ngritur ga ky i fundit për ligjin e ri të pronave. Në letrën adresuar kreut të shtetit, Jagland sqaron se kjo çështje do të shqyrtohet nga Komiteti i Ministrave të Këshillit të Evropës.
Po ashtu ai ofron ndihmën e KiE-së për procesin e kompensimit të rponave në Shqipëri.
Ja letra e plotë:
“I dashur President,
Ju falënderoj për letrën Tuaj të datës 16 maj në vazhdën e takimit tonë të shkëlqyer të 26 marsit ku ripërtëritët përkushtimin tuaj ndaj Konventës Evropiane të të Drejtave të Njeriut dhe zbatimin e saj në Shqipëri.
Shqetësimet tuaja lidhur me Ligjin e ri “Për trajtimin e pronës dhe përfundimin e procesit të kompensimit të pronave” që me sa di po shqyrtohet tani nga Gjykata Kushtetuese, i kam mbajtur parasysh me vëmendje.
Sikurse e dini, Komiteti i Ministrave i Këshillit të Evropës po e mbikëqyr nga afër çështjen, në kuadër të zbatimit të vendimit pilot “Manushaqe Puto kundër Shqipërisë (nr. 604/07)” të dhënë nga Gjykata Evropiane e të Drejtave të Njeriut më 31 korrik 2012. Në bazë të kërkesës suaj, kam siguruar që letra juaj të sillet në vëmendjen e Komitetit para takimit të tij të ardhshëm që do të mbahet në qershor 2016.
Në përfundim, dëshiroj të ripërsëris mbështetjen time për bashkëpunimin dhe ndihmesën e ofruar nga Këshilli i Evropës ndaj autoriteteve shqiptare në këtë proces të rëndësishëm.”, thuhet në letrën e Jagland për Kreun e Shtetit.
/a.m.
