Mediat italane vazhdojnë t’i kushtojnë rëndësi celules xhihadiste italo-shqiptare. Corriere shkruan se për ditë me radhë, ajo nuk përgjigjej në Skype. Mirëpo, më në fund, xhihadistja italiane, e cila është në kërkim për përfshirjen e saj në terrorizëm, u përgjigj. Linja nuk është e rregullt. Lidhja me Skype nuk është e mirë aq sa t’ia tregojë fytyrën, por zëri i saj dallohet qartësisht. Është e njëjta vajzë 28-vjeçare, me origjinë nga Torre del Greco, e cila është larguar për në Siri në shtator të vitit të shkuar me bashkëshortin e saj, shqiptarin Aldo Kobuzi.
Në fillim të bisedës, Maria Xhulia (Fatima Az Zahara) kërkon informacione. Familja e saj është ndaluar, ndaj ajo kërkon të dijë nëse ata janë mirë. Për muaj me radhë, ajo është përpijekur t’i bindë ata të largohen nga shtëpia dhe të nisin pelegrinazhin në Shtetin Islamik. Ajo madje i ka shpjeguar të ëmës, Assunta, të atit Serxho dhe motrës Mariana që të blejnë valixhe për udhëtim. E ka inkurajuar të atin 60-vjeçar të mbledhë para dhe të braktisë gjithçka e të shpërngulet në Siri. Mirëpo, para se të niseshin ata janë kapur. Për të, operacioni anti-terrorist që çoi në arrestimin e dhjetë personave është një “vrimë në ujë”, sepse nuk ka vlerë. “Është alogjike dhe e jashtë arsyes që policia italiane vendosi t’i arrestojë ata”, shprehet ajo.
Pavarësisht kësaj, ajo ka vazhduar të bisedojë me familjen, edhe pse e dinte se historia e tyre do të shkruhej në gazeta. “Mesazhet që kam shkëmbyer me prindërit dhe motrën nuk ishin nxitje për xhihad. Ne bisedonim sesi prindërit e mi mund të bënin një jetë më të mirë këtu, në Shtetin Islamik, është e justifikuar”.
Zëri i Maria Xhulia Serxho është i ftohtë në Skype. Çmenduria gjendet në çdo rrokje të fjalëve të saj. Ajo lëshon thirrje të forta kundër jobesimtarëve: “Ne vrasim pasi kështu urdhëron sharia”, e cila më pas jep detaje për të arrestuarit. “Kur i presim kokën dikujt, them ne sepse edhe unë jam pjesë e Shtetit Islamik, kur e bëjmë pra këtë veprim, ne i bindemi Sharias”.
Maria Xhulia u martua në vitin 2014 me një luftëtar të ISIS-it. Ajo u bë gruaja e një xhihadisti dhe fitoi të drejtën të largohej dhe t’i bashkohej luftës së shenjtë. Ishte studente e Bioteknologjisë në Universitetin e Milanos, e cila pëlqente të vinte makijazh. Ndërsa sot është kthyer në një terroriste. Justifikon dhunën dhe ekzekutimet me prerje koke. Dhe është e gatshme të jetojnë nën tutelën e burrave përdhunues, që skllavërojnë dhe u presin kokat grave, që i akuzojnë për magji, ashtu siç ndodhte në Mesjetë.
Ajo flet në Skype: “Ata që dënohen me prerje koke janë hajdutë, hipokritë, veprojnë si spiunë në Shtetin Islamik. U japin informacione jobesimtarëve dhe pastaj na sulmojnë ne”, bërtet në mikrofon. Dhe më pas: “Kjo nuk është robëri, por nder. Mjaft më me të njëjtat argumente. Është e kotë të vësh në pikëpytje torturën, brigadat e grave dhe fëmijve që përdoren si ushtare…”
“Shteti Islamik është vendi perfekt. Këtu nuk bëjmë asgjë që del kundër të drejtave të njeriut. Ne veprojmë kundër atyre që nuk ndjekin ligjet e Allahut”. Indoktrinomi është aq i thellë, aq sa ajo përpiqet të rekrutojë edhe intervistuesin. “I di historitë e Guantanamos ose burgjeve të tjerë të fshehur. Shteti Islamik nuk torturon çdo të burgosur, në rregull. Por ai vepron sipas sharias. Sipas ligjit të Allahut mëshirëplotë”.
