Ja proçedurat e reja të kontrollit për bizneset VIP

E­ Bizneset e mëdha, VIP, do të rikualifikohen sipas një strategjie që do të zbatohet në tre vitet në vijim, e cila është hartuar nga Drejtoria e Përgjithshme e Tatimeve. Tatimet do të rikonceptojnë kriteret për klasifikimin e bizneseve në linjën VIP. Në planin strategjik të tatimeve për periudhën 2015­2019 thuhet se, të hartuar nga Drejtoria e Përgjithshme e Tatimeve, ekipet e tatimore do të specializohen për të kontrolluar VIP­at sipas sektorit ekonomik (p.sh., sektor financiar, telekomunikacion, energjetikë, ndërtim, prodhim, produkte farmaceutike, arsim, tregti, shërbime) dhe do të vazhdohet me mobilizimin e ekipeve me disa persona. Në strategjinë e publikuar mësohet se Drejtoria e Përgjithshme e Tatimeve parashikon që të ngrejë një mekanizëm të kontrollit të cilësisë së kontrolleve tatimore (p.sh., shqyrtim kolegjial, sektori i kontrollit të cilësisë, pyetësorë për tatimpaguesit).

Në këtë kuadër do të shikohet edhe mundësia e futjes së mjeteve elektronike të kontrollit tatimor dhe më pas në bazë të tyre do të merren vendimet. Gjatë kësaj periudhe tatimet do aplikojnë kompetencat e mbledhjes me forcë të detyrimeve për të përmirësuar efektivitetin dhe për të bërë ndryshimet e nevojshme. Do të krijohet një strukturë organizative e mbledhjes së borxhit pranë drejtorisë së përgjithshme dhe drejtorive rajonale.

TË ARDHURAT

Në strategjinë e Drejtorisë së Tatimeve është parashikuar që numri i tatimorëve, që do të grumbullojnë detyrimet me forcë do të rritet 10­15%. Ndërkohë që do të shqyrtohen masat për të siguruar pagesën paraprakisht të tatimit mbi fitimin dhe do të bëhen rekomandime për përmirësim (p.sh, akte ligjore dhe nënligjore). Tatimet në tre vitet në vijim do të zhvillojnë struktura dhe sisteme për ta fuqizuar funksionin e mbledhjes së informatave dhe do ta përqendrojmë mandatin e informatave të mbledhura për hetimin e mashtrimit tatimor. Gjithashtu tatimet do të rindërtojnë procesin e hetimeve për t’u marrë vetëm me hetimet dhe informatat e çështjeve penale dhe për t’i çliruar burimet e Task­Forcës për prioritete të tjera të administratës.

TATIMET

Ligji i ri “Për procedurat tatimore” parashikon që në rast se certifikimi i bilanceve të biznesit të madh bëhet nga kompani të njohura audituese, atëherë ai klasifikohet me risk të ulët dhe u shpëton kontrolleve të shpeshta të tatimeve. Sipas ndryshimit që i është bërë ligjit, është ministri i Financave ai që përcakton listën e kompanive audituese. Bizneset mund të klasifikohen me risk të ulët dhe të shpëtojnë nga kontrollet e shpeshta të tatimeve nëse kontraktojnë një kompani të njohur audituese që t’u certifikojë bilancet. Kjo është parashikuar nga qeveria në nenin 10 të ligjit “Për procedurat tatimore” të miratuar këtë javë nga Parlamenti. “Në rast se tatimpaguesi ka të certifikuara, nga kompani të njohura audituese, pasqyrat financiare që dorëzon pranë administratës tatimore brenda datës 31 mars të çdo viti, ku vërtetohet se janë në përputhje me legjislacionin fiskal, tatimpaguesi përfshihet në elementet me risk të ulët. Lista e kompanive audituese, modeli i certifikatës dhe rastet kur këto kompani kontrollohen për çështje të caktuara përcaktohen me udhëzim të ministrit të Financave”, thekson ligji. Fitimi i tatueshëm për periudhën tatimore përcaktohet në bazë të bilancit dhe shtojcave të tij, të cilat duhet të jenë në përputhje me ligjin “Për kontabilitetin”, me dispozitat e këtij ligji, si dhe me aktet nënligjore të nxjerra nga Ministria e Financave për këtë qëllim./Balkanweb