Ministri i Mbrojtjes i Izraelit, Yoav Gallant, njoftoi se trupi i shtetasit tajlandez Nattapong Pinta është gjetur gjatë një operacioni të posaçëm në qytetin Rafah, në jug të Rripit të Gazës.
35-vjeçari punonte si punëtor bujqësie në jug të Izraelit kur u rrëmbye gjatë sulmit të udhëhequr nga Hamasi më 7 tetor 2023. Sipas një zyrtari të ushtrisë izraelite, ai dyshohet të jetë vrarë gjatë muajve të parë të robërisë. Para operacionit, nuk dihej nëse ishte ende gjallë apo jo.
Trupi i tij u gjet pak ditë pasi ushtria izraelite kishte gjetur trupat e dy shtetasve izraelito-amerikanë në Gaza. Zyrtari ushtarak shtoi se Nattapong Pinta ishte i martuar dhe kishte një djalë të vogël. Ai punonte në Kibbutzin Nir Oz për të mbështetur financiarisht familjen e tij në Tajlandë dhe u rrëmbye nga një grup militant i njohur si Brigadat e Xhihadit (Mujahideen Brigades).
Forcat e Mbrojtjes së Izraelit (IDF) thanë në një deklaratë se operacioni për rikuperimin e trupit të tij u bë i mundur falë informacioneve të marra gjatë marrjes në pyetje të një “terroristi të kapur”.
Pas lajmit për gjetjen e trupit, BBC raportoi se kishte tentuar të kontaktonte bashkëshorten e viktimës, por ajo nuk kishte kthyer telefonatën. Më vonë, ajo kishte dërguar një mesazh me një fotografi të djalit të tyre duke qarë.
Forumi për Pengjet dhe Familjet e Personave të Zhdukur, një grup që lobon për lirimin e pengjeve, deklaroi se ky rikuperim ndodh pas “20 muajsh të tmerrshëm dhe të dhimbshëm pasigurie”. Ata i bënë thirrje qeverisë izraelite të arrijë një marrëveshje me Hamasin për lirimin e të gjithë pengjeve të mbetur.
Nattapong Pinta besohet të ketë qenë i fundit nga shtetasit tajlandezë të rrëmbyer gjatë sulmit të 7 tetorit. Pesë tajlandezë të tjerë u liruan gjatë një armëpushimi më herët këtë vit – të gjithë të gjallë.
Ushtria izraelite rikuperoi gjithashtu këtë javë trupat e një çifti të moshuar, Judy dhe Gadi Haggai, në qytetin Khan Younis në Gaza. Çifti u vra në të njëjtin kibbutz ku ndodhej edhe Nattapong dhe trupat e tyre ishin mbajtur gjithashtu nga Brigadat e Xhihadit, sipas IDF-së.
Ndërkohë, tensionet në jug të Gazës vazhdojnë. Të shtunën, gjashtë palestinezë u vranë dhe disa të tjerë u plagosën nga zjarri izraelit pranë një qendre shpërndarjeje ndihmash të mbështetur nga SHBA-të, sipas Agjencisë së Mbrojtjes Civile të kontrolluar nga Hamasi.
Ushtria izraelite deklaroi se kishte qëlluar me armë paralajmëruese ndaj personave që iu afruan në mënyrë kërcënuese.
Dhjetëra palestinezë janë vrarë dhe qindra janë plagosur këtë javë gjatë përpjekjeve për t’iu afruar qendrës së ndihmave.
Fondacioni Humanitar i Gazës, i cili menaxhon shpërndarjen e ndihmave, tha se ka pezulluar përkohësisht operacionet për shkak të mbipopullimit dhe për të rritur masat e sigurisë.
Pas një bllokade tre mujore, Izraeli ka filluar të lejojë sasi të kufizuara ndihmash humanitare në Gaza gjatë javës së fundit.
Janë bërë pothuajse 20 muaj që kur Izraeli nisi ofensivën ushtarake në Gaza si përgjigje ndaj sulmit të Hamasit më 7 tetor 2023, gjatë të cilit u vranë rreth 1,200 persona dhe 251 të tjerë u rrëmbyen.
Sipas Ministrisë së Shëndetësisë në Gaza, mbi 54,677 persona janë vrarë që nga fillimi i konfliktit. Nga 251 pengjet e rrëmbyer më 7 tetor, 54 mbeten ende në robëri – 31 prej tyre të shpallur të vdekur nga ushtria izraelite.
