Të paktën një person është vrarë dhe shumë të tjerë janë plagosur në një sulm me thika dhe të shtëna në Tel Aviv dhe Jeruzalem. Lajmin e kanë bërë të ditur autoritetet izraelite, sipas të cilave një agresor goditi me thikë 10 persona në zonën portuale të Jafës, në jug të Tel Avivit, duke vrarë 1 prej tyre.
Sipas burimeve, sulmi ndodhi pranë vendit që po vizitonte zv.presidenti i Shteteve të Bashkuara, Joe Biden. Në atë moment, zoti Biden po takohej me ish-presidentin izraelit Shimon Peres, pranë selisë së Qendrës Peres për Paqen.
Më herët, dy oficerë policie izraelitë u qëlluan dhe u plagosën në Jeruzalemin Lindor, ndërsa një hebre ultra-ortodoks u godit me thikë në lokalitetin Petah Tikva, pranë Tel Avivit.
Autoritetet bënë me dije se 5 nga të plagosurit me thikë në Jafa janë në gjendje të rëndë, ndërkohë që agresori, ende i paidentifikuar, u neutralizua nga policia.
Ndërsa në sulmin në Jeruzalem, një person i armatosur hapi zjarr ndaj një grup policësh, jashtë Portës së Damaskut, duke plagosur rëndë një prej tyre. I dyshuari plagosi edhe një tjetër gjatë ndjekjes, para se të qëllohej dhe vritej, sqaruan më tej autoritetet. TCh
