COVID-19 prej disa ditësh tashmë ka mbërritur edhe në Shqipëri dhe të shumta janë ato familje që përpos varfërisë, aktualisht mbajnë mbi supe edhe “panikun” se mos preken nga virusi në fjalë.
Ndërkohë “Fundjavë Ndryshe”, ashtu siç ka vepruar prej më shumë se 4 vitesh, vijon që të përmbushë misionin e saj primar: “Të ndihmojë njerëzit në nevojë”.
Drejtuesi i Fondacionit “Fundjavë Ndryshe” Arbër Hajdari përmes një videoje të bërë publike në rrjetet sociale, ka treguar se po përgatiten nga fondi i emergjencës pako ushqimore për mbi 5000 familje në nevojë.
“Ne po përgatisim pakot për mbi 5000 familje në nevojë. Mbi 100 ton ndihma. Faleminderit bamirësve! Zoti ju ruajtë të gjithëve”, shkruan Hajdari.
Gjithashtu… vlen të theksohet fakti se “FFN” ka nisur edhe një fushatë online, ku të gjithë shqiptarët mund të kontribuojnë për t’iu ardhur në ndihmë bashkëkombasve të tyre në këto ditë të vështira.
