Gjatë një takimi që ka patur me studentët e Universitetit të Firences, në lidhje me luftën kundër korrupsionit, kreu i Agjencisë Kombëtare kundër Korrupsionit në Itali, Raffaele Cantone ka marrë si shembull Shqipërinë dhe diplomat e blera në vendin tonë nga disa politikanë italianë.
“Kujtoj gjithmonë kur në parlament tundeshin diploma nga njerëz të cilët disa vite më parë kishin shkuar në Shqipëri dhe kishin blerë diploma. Kishte edhe nga ata që hidhnin monedha, por edhe ne e pamë se çfarë fundi patën”.- tha Cantone.
Para disa vitesh në median italiane plasi skandali i një diplome, që i biri i ish drejtuesit të “Lega Nord”, Umberto Bossi, kishte marrë në Shqipëri, në një universitet privat, pa qenë asnjë ditë në vendin tonë. Por në atë kohë nuk qarkulloi kurrë ndonjë e dhënë se politikanë italianë të mund të kishin bërë të njëjtën gjë.
Sipas Cantone-s këta lloj politikanësh “duhet të hidhen në qeli me forcën e ligjit”.
