Trajneri i Shqipërisë, Gianni De Biasi, në një intervistë me “Tuttosport” ka shprehur dëshirën që ndeshja me Italinë, e vlefshme për kualifikueset e botërorit, të luhej në veri të vendit. Takimi do të zhvillohet në mars të vitit të ardhshëm.
“Do të më pëlqente që ndeshja të luhej në veri. Ndoshta në Torino, por këtu u luajt Itali-Spanjë, ndoshta në Verona. Po edhe në Udin e apo Bolonja. Ndoshta Bolonja do të më pëlqente më shumë se të tjerat”, thotë De Biasi.
Ndonëse nuk e ka thënë arsye, është e qartë pse trajneri preferon veriun e Italisë. Përtej Adriatikut jetojnë shumë shqiptarë dhe pjesa dërrmuese janë në veri të vendit. Për më tepër, përtej kufijve veriorë të Italisë është Zvicra e më tej edhe Gjermania, prej nga vijnë shumë tifozë në ndeshjet jashtë të kuqezinjve.
Në miqësoren e luajtur midis dy skuadrave në nëntor 2014, stadiumi “Ferraris” në Gjenova ishte i mbushur më së shumti me shqiptarë, që dhuruan edhe një spektakël që mahniti italianët.
d.i.
