Një shqiptar është arrestuar nga autoritetet e Livornos për trafikim dhe posedim droge, pas një denoncimi të bërë në një aplikacion të policisë italiane. Mediat e vendit fqinj bëjnë me dije se shqiptarit me iniciale L.O, 35 vjeç, i është sekuestruar në garazh një sasi prej 830 kg drogë, nga të cilat 564 kg marijuanë e 266 kg hashash, si dhe një pistoletë lodër. Kjo e fundit ishte pikërisht ajo e cila çoi policinë italiane në gjurmët e drogës.
Arrestimi i 35-vjeçarit erdhi nga një operacion i ndërmarrë pas një denoncimi anonim në “YouPol”, aplikacion i policisë italiane, ku qytetarët mund të sinjalizojnë për çdo gjë të dyshimtë e antiligjore. Në denoncim thuhej se një i huaj po lëvizte në zonën “Montebello” me një pistoletë e makinë gri.
I dyshuari është pikasur nga autoritetet italiane në bordin e automjetit teksa po bëhej gati për të hyrë në garazhin e tij në rrugën “Ebat”. Gjatë kontrollit të ushtruar në makinë atij iu gjend pistoleta, që i çoi më pas efektivët e policisë edhe në ushtrimin e kontrollit në garazh./a.meta
Sasia e kapur e drogës
