Policia italiane ka arrestuar sot 13 shqiptarë me akuzën e krimit të organizuar në trafikimin e kokainës. Lajmi bëhet i ditur nga mediat italiane sipas të cilave, banda kriminale ishte e aftë të tregtonte 20 kg kokainë në javë, pothuajse një ton në vit me një vlerë që kapërcente 130 milionë euro.
Sipas asaj që bëhet e ditur nga hetimet, vetëm në periudhën e shkurtër kohore prej 20 deri më 23 mars 2015, kjo bandë kishte fituar nga trafikimi i kokainës rreth 1 milionë euro.
Hetimet e Prokurorisë së Brescia kishin nisur një vit më parë pas dyshimeve të agjentëve të financës italiane mbi identifikimin e një gruaje shqiptare që blinte në një farmaci, një sasi të konsiderueshme medikamenti për fëmijë, mjaft i përdorur në përgatitjen e kokainës.
Ky operacion policor u shtri dhe në provincat e Bergamos, Milanos, Piacencës, Parmës e Peruxhias e falë përgjimeve telefonike u bë e mundur arrestimi i 13 shqiptarëve.
Në momentin e arrestimit u sekuestruar 16 kg kokainë, 2 kg hashash, para të thata e armë. Grupi kriminal i shqiptarëve drejtohej nga kushërinjtë Altin e Fatos Beqja, nën mbikqyerjen e Sokol Xhetës, Emirjan Beqes e Dëfrim Shamkut.