Shteti Islamik ka ulur për herë të parë rrogat e nëpunësve dhe luftëtarëve të tij, si dhe ka hequr çmimin fiks të bukës në dyqanet e Rakkas në Siri. Nga Uashingtoni shërbimet sekrete njoftojnë se ISIS ka vendosur për herë të parë masa shtrënguese financiare, duke përgjysmuar rrogat e kontigjentit të ushtarëve dhe të zyrtarëve që punojnë në qendrën administrative, në Rakka të Sirisë.
Këto masa, thonë shërbimet sekrete amerikane, diktohen nga disa rrethana konkrete, ku bëjnë pjesë goditjet e forta që kanë marrë karvanet e cisternave me naftë që shitet në vendet fqinje. Së dyti, goditjet e amerikanëve dhe rusëve në ekonominë gri që ka ndërtuar ISIS në veri të Irakut dhe në Siri. Së treti, rënia e çmimit global të naftës, që ka dëmtuar produktin kryesor që furnizon Shtetin Islamik, së katërti, avancimi i pandaluar i rezistencës kurde, në zonat e kontrolluara deri më sot nga ISIS.
Shërbimet sekrete presin të shohin nëse këto masa shtrënguese do të shtrihen edhe në pjesë të tjera të Kalifatit, apo do të mbeten në fuqi vetëm në Rakka. Pak ditë më parë në rrjet u shpërnda një video, e cila tregonte hedhjen në erë të një banke në Mosul, ku nga shpërthimi u pa një “re” e vërtetë kartmonedhash në ajër. Ky presion në rritje, ka bërë që Al Bagdadi ta ketë gjithnjë e më të vështitrë të mbajë në këmbë dhe të ushqejë sistemin tashmë të shtrirë të asistencës sociale, aparatit burokratik dhe ushtrisë, në zonat e kontrolluara nga forcat e tij.
