Ish-zyrtarët e lartë të Drejtorisë së Sigurimit të Shtetit (UDBA) të ish-Jugosllavisë, Josip Perkoviç dhe Zdravko Mustaç, siç transmeton AA, në Gjykatën në Mynih janë dënuar me burg të përjetshëm për shkak të pjesëmarrjes në vrasjen e emigrantit kroat Stjepan Gjurekoviç.
Pas ekstradimit të Josip Perkoviçit në Gjermani në janar të vitit 2013 dhe gjykimit që filloi para Gjykatës së Lartë Shtetërore në tetor të vitit 2014, Perkoviçit sot iu shqiptua dënimi me burg të përjetshëm.
Së bashku me Perkoviçin gjykimi është zhvilluar edhe për Zdravko Mustaç, po ashtu zyrtar i lartë i UDBA-s të cilin e ekstradoi Kroacia.
Bëhet fjalë për aktvendim ndaj të cilit Perkoviç dhe Mustaç kanë të drejtë të ankohen. Josip Perkoviç ndër vite ka qenë shef i Sektorit të UDBA-s për terrorizëm ndërsa në kohën e granatimit të pallatit historik “Banski dvori” ishte ndihmës i ministrit të Mbrojtjes, Gojka Shushka.
Perkoviç është ekstraduar në Gjermani pas një varg tentimesh të Qeverisë kroate që ta parandalojë këtë, ndërsa me hyrjen e Kroacisë në BE erdhi deri te ndryshimi i ligjit për ekstradimin e qytetarëve kroatë në BE, i cili atëherë quhej “lex Perkoviç”.
Vrasja është kryer në korrik të vitit 1983, në një garazh jo shumë larg Mynihut, ndërsa Stjepan Gjurekoviç para emigrimit në Gjermani ishte zyrtar i lartë i INA-s. Krunoslav Prates, pronar i garazhit në të cilën është vrarë Gjurekoviq është dënuar në Gjermani me burg të përjetshëm. (b.an)
