Ka kushtuar miliona euro, ka luajtur në një klub gjigant si Bayern Munich, por ai tani ka përfunduar tek skuadra turke Besiktas.
Fjala është për sulmuesin gjerman, Mario Gomez i cili zyrtarisht do të jetë pjesë e Besiktasit ku do të nënshkruajë kontratë afatgjate.
Skuadra turke dhe Fiorentina kanë arritur një marrëveshje për transferimin e plotë të lojtarit për një shumë të pabesueshme prej 1000 eurove.
Këtë e ka bërë të ditur në drejtori i përgjithshëm i Fiorentinës Andrea Rogg.
“Jemi shumë të kënaqur për Gomezin, meriton suksesin që po merr atje. Sezonin e ardhshëm kontrata e tij me ne do të skadojë, nëse do të ketë dëshirë të qëndrojë në Turqi kemi rënë dakord me Besiktas për një shumë simbolike, që është shumë larg 9 milionë eurove”, deklaroi Rogg, transmeton Telegrafi.
“Kjo zgjidhje është bërë duke marrë në konsideratë faktin se ne nuk paguajmë rrogën e lojtarit”, tha Rogg.
Konfirmimi ka ardhur edhe nga Gokhan Sari, koordinatori i përgjithshëm i Besiktas, i cili ka shpjeguar se do t’i paguajnë 1000 euro Fiorentinës.
“Gomez është huazuar me të drejtën e blerjes. Për ta pasur në dispozicion në sezonin 2015/16 kemi paguar 3,5 milionë euro. Nëse lojtari do të shprehë dëshirën për të qëndruar me ne brenda prillit, Fiorentinës do t’i shkojnë 1000 euro. Klubi italian do të përfitojë një përqindje nëse lojtari do të shitet në një moment të dytë”, tha Sari.
Ky lajm ka pushtuar mediat botërore, pasi shuma prej 1000 eurove është e pabesueshme për një lojtar si Mario Gomez që katër vite më parë kishte vlerë mbi 30 milionë euro.
