Ish-trajneri i Kombëtares, Astrit Hafizi, dhe aktualisht analist sportiv në “Supersport”, gjatë analizës së djeshme që i bëri sfidës Izrael-Shqipëri, e konsideroi një paraqitje shumë të mirë të kuqezinjve. Sipas tij, përfundimi i Shqipërisë në vendin e 3-të në klasifikim do të ishte një pozicion i justifikuar.
“De Biazi është i justifikuar me vendin e tretë. Në të tilla raste, Sadiku e tregoi që është bomber në të gjithë kuptimin e fjalës. Janë momente që ai e ndalon topin mirë, kthehet dhe godet menjëherë. Përpara golit bëri një goditje të tillë dhe e priti portieri. Më pas bëri pesë gjuajtje në portë dhe shënoi dy gola. Një rendiment shumë i lartë. Janë veprime tipike të sulmuesve cilësorë”, tha fillimisht Hafizi.
Më tej bëri edhe një analizë më të detajuar të lojës: “Në momente të veçanta, ishim superiorë në mbajtjen e topit. Kishim siguri në kalimin nga njëri krah në tjetrin. Ishim të qetë dhe jo të acaruar me topin. Ishim të saktë dhe goli na bëri me krahë. Nuk gabuam thuajse fare në veprimet mbrojtëse. Skuadra mori frenat e lojës.
Megjithatë, situata duhet të shihet me qetësi dhe të mos kalohet në eufori të theksuar. Edhe pas fitores me Maqedoninë kaluam në eufori dhe më pas gjërat rrodhën ndryshe. Në katër ndeshjet që kanë mbetur, na duhet të marrim dy fitore dhe arritja e vendit të tretë është një pozicion shumë i mirë për ne”, tha ndër të tjera Astrit Hafizi në analizën e tij pas takimit./a.ç