Tokat e ish-kooperativave dhe ish-ndërmarrjeve bujqësore të zëna në mënyrë të paligjshme do t’i kalohen Agjencisë së Trajtimit të Pronave me qëllim që të përdoren për kompensimin fizik të ish pronarëve.
Këshilli i Ministrave ka miratuar disa ndryshime në ligjin për titujt e pronësisë mbi tokat bujqësore. Ato parashikojnë që drejtoritë e administrimit dhe mbrojtjes së tokës, së bashku me komisionet vendore, të dërgojnë brenda 2 muajsh për regjistrim në ZVRPP vendimin gjyqësor përfundimtar për sipërfaqet e tokës të liruara nga fitimi, mbajtja dhe përdorimi i paligjshëm i tyre, që kalojnë në pronësi të shtetit.
Komisioni vendor, një kopje të vendimit gjyqësor përfundimtar, të planvendosjes së ngastrave i paraqet në Agjencinë e Trajtimit të Pronës. Këto sipërfaqe të tokës përdoren për fondin e kompensimit fizik, në zbatim të ligjit “Për trajtimin e pronës dhe përfundimin e procesit të kompensimit të pronave”.
Ndërkaq, Komisionet vendore kanë detyrimin që, brenda dy muajve, nga data e hyrjes në fuqi e këtij vendimi, të paraqesin në Agjencinë e Trajtimit të Pronës të gjitha vendimet gjyqësore përfundimtare, të marra para kësaj date, të shoqëruara me planvendosjet e ngastrës/ave dhe procesverbalin/et përkatës.
ma.me
