Ish-deputeti i Lëvizjes Socialiste, njëherësh ish-ministër i Drejtësisë, Edmond Panariti, bëri një reagim të martën lidhur me përhapjen e koronavirusit. Sipas Panaritit, temperatura mjedisore është pikë kthese në përhapjen e infeksionit të koronavirusit.
“Temperaturat mjedisore 8.72 gradë celsius pikë kthese në përhapjen e infeksionit të koronavirusit. Një studim mbi dinamikën e përhapjes së koronavirusit i cili na jep shpresë”, thotë Panariti. Ai, më tej, i referohet një deklarate të Donald Trump që thekson se “me ngrohjen e motit kurba e infeksionit të koronavirusit do të bjerë ndjeshëm”.
Megjithatë, Panariti citon një studim të kryer nga një grup shkencëtarësh në Gauanxhout dhe Harvardit, që dëshmojnë se “dinamika e përhapjes së koronavirusit ndikohet ndjeshëm gna faktorët klimatikë si temperatura dhe lagështia”.
“Ky studim ka marrë në shqyrtim të gjitha rastet e koronavirusit të shfaqura globalisht, përfshirë edhe rastet në mbi 400 qytete në Kinë që nga data 20 janar deri në 4 shkurt. Këto të dhëna epidemiologjike, janë modeluar krahasuar dhe përpunuar në mënyrë kompjuterike me treguesit meteorologjikë të këtij harku kohor në zonat përkatëse. Ka dalë një e dhënë mjaft interesante!
Numri i rasteve të infeksionit me koronavirus është rritur në mënyrë lineare me temperaturën e mjedisit deri kur ajo ka shënuar vlerën 8.72 gradë celsius. Por me rritjen e mëtejshme të temperaturës së mjedisit, numri i rasteve ka shënuar rënie. Por, në studim thuhet se vetëm temperatura dhe ndryshimi i motit, pa masa parandaluese të forta nuk do të mund ta kontrollojë e vetme infeksionin”, shkruan Panariti. /e.s/
