Ish-ministri i mbrojtjes Fatmir Mediu i cili akuzohet për shpërdorim detyre për tragjedinë e Gërdecit është paraqitur sërish në Gjykatën e Posaçme.
Mediu ka shkuar në GJKKO pasi iu refuzua kërkesa e ekspertimit të pjesshëm mbi faturën e dëmit ekonomik, që i ka kushtuar ish-ministrit i cili ndodhet nën akuzë për shpërdorim detyre.
Ish-ministri i Mbrojtjes foli për mediat për akt ekspertizën ku edhe hodhi pikëpyetje mbi përfundimet.
“Ekspertët bëjnë vlerësime juridike, që janë jashtë tagrit të tyre. DASH nuk vlerëson një kërkesë, por të gjithë dokumentacionin. Ka shumë detaje para se të lejohet përcjellja e teknologjisë ushtarake në Shqipëri.
Ekspertët i bëjnë bisht pyetjes edhe nëse janë njohur ose jo me licencat e SAC. Ekspertët nuk kanë asnjë njohuri se çfarë licencash nevojiten në SHBA dhe Shqipëri për këtë proces. Unë duke kërkuar në dokumentacion arrita të gjej disa licenca të SAC, licenca për të cilat është marrë në vijimësi leje nga SHBA.
Departamenti i Mbrojtjes, por edhe i Transportit në SHBA kanë dhënë leje për procesin. Nëse SAC do ishte kompani mashtruese, atëherë përse akuza nuk ka ngritur asnjë çështje ndaj kësaj kompanie. Pretendohet se nuk kanë paguar detyrimet financiare”, është shprehur Mediu.
/a.r
