Ish-ministri i Jashtëm Besnik Mustafaj thotë se PD nuk duhet të humbasë fokusin duke u marrë me vettingun në politikë, pasi sipas tij këtë proces e bën shumë mirë ligji për dekriminalizimin.
“Ligji për dekriminalizimin ka konstatuar njerëz të padenjë për të qenë në parlament. PD duhet ta çojë më tej këtë ligj dhe ta bëjë efikas.
Propozimi për vettingun në politikë është i mirë, por është pjesë e ligjit për dekriminalizimin, pasi nuk mendoj se do bëjë më shumë vettingu në politikë.
Unë mendoj se PD duhet ta çojë përpara iniciativat e saj. Ajo që mua më shqetëson është humbja e fokusit. PD duhet të fokusohet tek ligji i dekriminalizimit për ta pastruar skenën politike, pasi ligji i dekriminalizimit është shumë i mirë, tha Mustafaj.
I ftuar në rubrikën ‘Opinion’ në News24, ndër të tjera ai u shpreh se PD duhet të ketë prioritet edhe reformën zgjedhore, pasi nuk ka treguar vlerësim deri tani për këtë reformë të rëndësishme.
