Ish-ministri i Drejtësisë, Ylli Manjani ka komentuar deklaratat e Zëvendësndihmës Sekretarit Amerikan për Çështjet Euroaziatike, Matthew Palmer për çështjet që lidhen me integrimin e Shqipërisë në Bashkimin Evropian.
Me anë të një postimi në Facebook, Manjani shkruan për “3 haberë, siç i quan ai, që vijnë nga Amerika”. E para që SHBA është e zhgënjyer nga vendimi i BE për të mos hapur negociatat me Shqipërinë dhe Maqedoninë e Veriut.
E dyta heqja e vizave për Kosovën nga BE dhe e treta ka të bëjë më raportin e DASH ku thuhej se “Shqipëria nuk ka as standardet minimale për të luftuar drogën e trafiqet”.
Për Manjanin, të treja këto mesazh qëndrojnë, por ai nuk beson që Palmer të jetë e zhgënjyer nga vendimi i BE për Shqipërinë.
Postimi i plote i Manjanit:
3 habere nga Amerika.
1.Zoti Palmer tha dje se “… SHBA janë të zhgënjyer pse BE nuk i çeli negociatat Shqipërisë e Maqedonisë së Veriut”. (…)
2.Po dje, Zoti Palmer tha se “…BE duhet të heqë vizat Kosovës”. (….)
3.Gjithashtu dje u lëshua edhe raporti vjetor i DASH (vendit ku merr rrogën Palmeri), ku thuhej se “Shqipëria nuk ka as standardet minimale për të luftuar drogën e trafiqet” (….)
Të tre mesazhet qëndrojnë. I kemi në të gjithë në kurriz dhe i mbajmë me kosto të jashtëzakonshme.
Por që të besoj se Palmeri na qenka “i zhgënjyer” e kam të pamundur.
Janë disa çështje që BE nuk i toleron aq kollaj. Le pastaj ti mbështesë siç ka bërë zoti Palmer. Fjala vjen zgjedhjet moniste, kriminalizimin me zor të opozitës, shkatërrimin e pushtetit gjyqsor apo lëbizjet e kufinjve ndërmjet shteteve si pa gjë të keq, të cilat i ka mbështetur Palmeri, BE i ka të papranueshme. Them BE e shtetet e saj jo detyrimisht Giggi e ndonjë shok e shoqe tjetër…
Së dyti, BE jo vetëm nuk toleron por e ka në kurriz ekonominë e drogës dhe të trafiqeve me të cilën mbijeton Shqipëria. Ndërkohë që kjo ekonomi zhvillohet nën vëzhgimin e rrepte e të detajuar të shtetit të zotit Palmer. Por ky i fundit nuk ka asnjë fjalë për të thënë.
Së treti, zoti Palmer dhe ambasada këtu nuk janë korrekt as me raportin zyrtar të DASH, në ato që thonë. Tjetër thonë e tjetër gjë lënë me shkrim. DASH thotë ka drogë, zyrtarët e tij thonë ka reformë e progres….
Së fundi, zotit Palmer nuk i shkon hiç të shqetësohet për vizat e shqiptarëve të Kosovës në BE, për sa kohë që Ai dhe shteti i tij i vënë viza të gjithë shqiptarëve kudo që janë. As që u shkon mendja ti heqin vizat që kanë vetë në dorë, por u shqetësokan për viza që lëshon Europa!!!
Edhe aleatë edhe me viza nuk shkon!
Nejse në gjithë haberet e djeshme një gjë del qartë, se kjo Amerika nuk paska gjë në dorë për hallet që kemi. Thjesht na ofron një zhgënjim, të cilin e kemi vetë me bollëk./m.j
