Akuzat e ish-oficerit të policisë, Emiljano Nuhu kundër një grupi personash, mes të cilëve bën pjesë edhe kryetari i grupit parlamentar të Partisë Socialiste, ka ndezur debatin e radhës në radhët e politikës. Menjëherë pas intervistës së Nuhut, ku denonconte faktin sesi Balla së bashku me deputetin e PS, Rrahman Rraja e disa persona të tjerë e kishin kërcënuar për të mbyllur dosjen e Xhisiela Malokut, reagoi edhe opozita.
Deputetë të PD, por edhe të LSI nisën sulmet politike, duke shënjestruar më së shumti Taulant Ballën. Ish-kryetari i Shërbimit Informativ të Shtetit, Fatos Klosi e komenton këtë qëndrim të opozitës si diçka absurde. Gjatë një prononcimi për gazetën “SOT”, Klosi deklaroi se nuk mund të bëhet politikë dhe opozitë me të tilla ngjarje.
“Unë kam përshtypjen që PD ishte brenda ngjarjes. Ajo është absurde. Ata mbase pandehin se e kanë më të lehtë, kanë gjetur këtë mënyrë të të bërit politikë, duke akuzuar deputetë të Partisë Socialiste, veçanërisht ata më të rëndësishmit për gjëra të tilla. Ndërkohë që lufta në politikë duhet të jetë krejt ndryshe, populli pret të paktën që të diskutohet mbi ekonominë, për problemet kryesore dhe orientimet kryesore të ekonomisë, mbase pret edhe për vetingun. Pra ka probleme edhe më të rëndësishme për të diskutuar dhe zgjidhur sesa ngjarje të tilla që jo tentuan ta mbyllnin çështjen, jo nuk tentuan ta mbyllnin çështjen”, u shpreh ai.
Sipas Klosit, opozita po tregon një nivel shumë të ulët me këto ngjarje. Ai theksoi se mesa duket, tashmë kauzat e kampit opozitar përfaqësohen nga “Babalja”.
“PD gjen dëshmitarë si Babalja atëherë dhe mua më duket absurde që kauza e opozitës të përfaqësohet nga një luftë në të tilla nivele. Më duket një nivel shumë i ulët i opozitës dhe është e pazonja për të bërë opozitë të vërtetë. Nuk është kjo një opozitë e vërtetë. Të tilla gjëra njerëzit i shikojnë, qeshin, por vetëm kaq”, tha ish-kryetari i SHISH, Fatos Klosi.
a.ç
