Zërat kritikë për kreun e Partisë Demokratike Lulzim Basha si fajtor për humbjen e thellë në zgjedhjet vendore sa vijnë e shtohen çdo ditë. Këtë radhë ka qenë ish-këshilltari i Sali Berishës për çështjet e menaxhimit urban, Flamur Kuçi i cili ka bërë përgjegjës kryesor për humbjen e PD-së pikërisht kreun e saj Lulzim Basha.
Në një intervistë për gazetën “Shekulli”, ish-këshilltari Kuçi thekson se “Basha zgjodhi kandidatët e PD-së, ndërtimin e tezave dhe zgjodhi të ishte vetë imazhi i opozitës.
“Çdo tendencë për ta devijuar, kamufluar apo zbehur këtë përgjegjësi është një prerje në besë dhe tallje e elektoratit”, thotë ai
Kuçi i kujton Bashës dorëheqjen e Berishës pas humbjes së zgjedhjeve të vitit 2013 dhe nënvzon se nëse PD-ja do të vazhdojë të drejtohet po me të njëjtën arrogancë rrezikon të kthehet forcë e tretë në vend. Sipas Kuçit në këto zgjedhje vendore, Basha e rrudhi PD-në edhe me 100 mijë vota të tjera.
“Në këto zgjedhje Partia Demokratike ka pësuar një disfatë tjetër pas asaj të vitit 2013 duke thelluar rrudhjen edhe me 100.000 vota të tjera. Koalicioni i partive të drejtuar nga Basha ka marrë në 2015-ën vetëm 507,000 vota nga 606,000 vota që ka marrë para dy vitesh (duke u rrudhur në më pak se 34% të votave). Basha ia ka dalë ta rrudhë të djathtën me 100,000 vota në dy vite. (PD)… rrezikon të kthehet forcë e tretë në vend. Kjo rrudhje e PD-së kulmon me humbjen e thellë në Tiranë; një protestë e qartë e votuesve ndaj mënyrës më të papërgjegjshme të qeverisjes së kryeqytetit nga vetë Basha”, shprehet ai.
