Ish-drejtori i “CEZ Albania”, Josef Hejsek do të gjykohet në mungesë në Shqipëri, për akuzën e mashtrimit me pasoja të rënda.
Prokuroria e Tiranës, pas më shumë se një viti që përpiqet të kontaktojë ish-kreun e CEZ-it, ka vendosur që ta gjykojë atë në mungesë.
Nga kontakti i fundit nëpërmjet letërporosive dërguar Ministrisë çeke të Drejtësisë, rezulton se Hejsek nuk është më pjesë e kompanisë CEZ as në Çeki.
Por ndryshe nga herët e tjera, nga letërkëmbimi i fundit, Ministria çeke e Drejtësisë i ka vënë në dispozicion Prokurorisë së Tiranës një adresë ku banon Hejsek.
Duke qenë se Shqipëria nuk ka marrëveshje ekstradimi me Çekinë, Hejsek do të gjykohet në mungesë në vendin tonë dhe vendimi penal do t’i dërgohet më pas për ekzekutim autoriteteve çeke.
Josef Hejsek akuzohet se, së bashku me administratorin e “DIA”-s, Kastriot Ismailaj, kanë përvetësuar shuma në mbi 5 milionë dollarë nga mbledhja e borxheve të CEZ-it në vendin tonë.
Hejsek po kërkohet edhe nga Gjykata e Tiranës, e cila ka pranuar ta thërrasë si dëshmitar në procesin ndaj Ismailajt, ashtu sikurse kërkohej edhe nga Komisoni hetimor parlamentar, që po verifikon procedurën e privatizmit të Operatorit të Sistemit të Shpërndarjes (OSSH) së energjisë nga CEZ-i, një komision i kryesuar nga deputetët e mazhorancës së majtë.tch/a.k
