Gjok Jaku, ish-deputet i Partisë Socialiste, zv.ministër dhe kryebashkiak do të jetë drejtori i ri i Hipotekës në Shkodër.
Ai është komanduar në këtë detyrë pas arrestimit të Zamir Lekës për korrupsion.
Jaku ka qenë më herët zv.drejtor i Përgjithshëm i Hipotekës.
Po ashtu, ai ka qenë kryetar i bashkisë Lezhë në një mandat për tu bërë më pas deputet i PS.
Ai ka shërbyer edhe si zv.ministër i Bujqësisë.
Prezantimi i Jakut para stafit u bë gjatë ditës së sotme.
***
Gjokë Jaku është drejtori i ri i Hipotekës së Shkodrës, pas arrestimit të drejtorit të mëparshëm Zamir Leka.
Jaku mbante postin e zëvendësdrejtorit të përgjithshëm të hipotekës në Shqipëri. Duke parë situatën e fundit dhe vështirësitë në Hipotekën e Shkodrës, pas rasteve korruptive dhe shkarkimit e arrestimit të disa zyrtarëve të këtij institucioni, Drejtoria e Përgjithshme ka vepruar menjëherë duke mos e lënë bosh vendin e drejtorit në Hipotekën e Shkodrës.
Në këtë mënyrë, Gjokë Jaku është prezantuar si kreu i ri në Zyrën e Regjistrimit të Pasurive në Shkodër. Gjatë ditës së sotme është bërë edhe prezantimi i ri përpara punonjësve të mbetur në Hipotekën e Shkodrës. Tashmë, pas arrestimit të drejtorit të mëparshëm Zamir Leka dhe shkarkimit të tij bashkë me disa zyrtarë të tjerë apo ndalimit të ish-juristit Mirjam Bletaj dhe procedimit të ish-juristes, Frida Mirashi, drejtori i ri i komanduar që vjen nga qendra nuk do ta ketë të lehtë që ta normalizojë situatën.
Momentalisht, Hipoteka e Shkodrës pas kësaj goditjeje të prokurorisë dhe policisë është e trazuar, ndaj do të duhet pak kohë që gjendja t’i rikthehet normalitetit.
Gjokë Jaku nuk është një emër i panjohur pasi ka mbajtur disa detyra të rëndësishme në rang qendror, por edhe rajonal duke qenë në poste të ndryshme. Ai vjen nga radhët e Partisë Socialiste.
Ditët e fundit, kreu i mëparshëm Zamir Leka u arrestua teksa ndodhej në zyrën e tij pasi akuzohet nga prokuroria dhe policia për korrupsion, ndërsa ka dyshime se për një praktikë merrte 5 mijë euro apo edhe më shumë në disa raste dhe këtë, sipas organit të akuzës, e bënte i ndihmuar nga ish-juristja Frida Mirashi, e cila u la në “arrest shtëpie”.
Përpara ish-drejtorit Leka, prokuroria lëshoi urdhër-ndalimi edhe për ish-juristin Mirjam Bletaj dhe disa sekserë të dyshuar që u merrnin para të tjerëve për praktika të ndryshme në zyrën e Hipotekës së Shkodrës.
Tashmë, për një kohë të pacaktuar në Hipotekën e Shkodrës do të qëndrojë i komanduar zëvendësdrejtori i përgjithshëm, Gjokë Jaku.
/b.d
