“Për atë çfarë Albini [Kurti] më tha, takimi me Sekretarin tonë të Shtetit ishte pozitiv, në forcim të marrëdhënieve jetësore ShBA-Kosovë për të cilën kam qenë i shqetësuar, dhe sipas mendimit tim, marrëdhënia më e rëndësishme jetësore që Kosova duhet ta ketë në këto kohëra të vështira”.
Kështu e shpjegoi përmbajtjen e takimit me Kryeministrin e Kosovës, Albin Kurtin, ish-Ambasadori i OSBE-së, William Walker, për Albanian Post.
“Nuk ishim takuar qe shumë kohë, dhe ishte mirë shumë që u takuam”.
Por as kësaj here, ish-ambasadori Walker nuk ishte pa një zhgënjim.
“Zhgënjim ishte që Presidentja [Vjosa Osmani] u desh ta anulonte takimin minutën e fundit”.
“Me të vërtetë kisha pritur ta takoja”, tha Walker për Albanian Post.
Megjithëkëtë, Walker u shpreh se “mbresëlënëse” ishte Ministrja e Ekonomisë, Artane Rizvanolli.
“Më ra ta takoj ministren e energjisë/ekonomisë, e cila favorshëm më la përshtypje”.
Më 21 korrik, Walker gjatë një interviste për AP pati thënë se marrëdhëniet mes Kosovës dhe Shteteve të Bashkuara të Amerikës “nuk janë më siç kanë qenë në të kaluarën”.
Rënie që Kosovës s’guxon t’i ndodhë, “për shkak se këto raporte janë të rëndësisë së jashtëzakonshme”, pati thënë ai.
“Më lejoni ta shpjegoj zhgënjimin tim. Kam qenë i zhgënjyer, për shembull, që qeverisë së tashme iu desh më shumë se një vit që të vijë në Washington për një vizitë të çfarëdoshme. Mendoj se marrëdhëniet mes Washington-it dhe Prishtinës janë jashtëzakonisht të rëndësishme, por për atë kohë aq të gjatë, qeveritarët shkuan në Berlin, nëpër kryeqytete të Evropës dhe vende tjera, por nuk erdhën në Washington”, tha ai.
