Kryeministri i Republikës së Kosovës, Isa Mustafa, ndau shpërblimin shtetëror për xhudisten Majlinda Kelmendi, fituese e medaljes së artë në Kampionatin Evropian të Xhudos që u mbajt në Rusi. Gjatë kësaj ceremonie, po ashtu u ndanë çmimet edhe për Nora Gjakovën, fituese e medaljes së bronztë në këtë kampionat, si dhe për trajnerin e xhudisteve, Driton Kuka, bëhet e ditur përmes një komunikate.
Të pranishëm në këtë ngjarje ishin edhe zëvendëskryeministri, njëherësh ministër i Kulturës, Rinisë dhe Sporteve, Kujtim Shala, kryetari i Federatës së Xhudos, Agron Kuka, dhe zyrtarë të tjerë shtetëror.
Mustafa ka shprehur edhe një herë mirënjohjen dhe vlerësimet më të larta për Majlinda Kelmendin, Nora Gjakovën si dhe kryetarin e Federatës dhe trajnerin për punën e mrekullueshme dhe përfaqësimin dinjitoz të Kosovës në Rusi, por edhe në vendet tjera.
Shpërblimet shtetërore për sportistët që arrijnë rezultate të larta janë ndarë në bazë të Rregullores Nr. 15/2013 për ndarjen e shpërblimeve shtetërore për sportistët që arrijnë rezultate kulminante në garat ndërkombëtare.
Sipas saj, fituesja e medaljes së artë shpërblehet me shumën prej 20 mijë euro ndërsa fituesja e medaljes së bronztë shpërblehet me 8 mijë euro. Ndërkaq, trajneri shpërblehet me gjysmën e shumës së fituesve, 10 mijë, përkatësisht 4 mijë euro.
