Trupi i heroit kombëtar Isa Boletini do të prehet në Vlorë përkrah babait të kombit shqiptar Ismail Qemali. Kjo është bërë e ditur ditën e sotme nga kryeministri Edi Rama dhe Ministri i Jashtëm i Kosovës Hashim Thaçi.
Në fjalën e tij para medias, shefi i qeverisë shqiptare theksoi se kjo do të bëhet më 10 qershor, nën një ceremoni madhështore. Rama e cilësoi këtë si një akt mjaft domëthënës për historinë e Shqipërisë, ndërsa falenderoi edhe familjarët Boletini për lejen e dhënë.
“Jemi të bindur se po bëjmë gjënë e duhur për të nderuar këtë figurë por edhe për tu përcjellë gjeneratave të rejave mesazhin e fortë të ëndrrës dhe betejës së përbashkët të këtyre dy baballarëve të Kombit dhe padyshim edhe të Shtetit tonë. Falënderoj familjarët dhe nënvizoj në fund se së bashku me Isa Boletinin do të vijnë në Vlorë, edhe eshtrat e bashkëluftëtarëve të tij të vrarë në të njëjtin moment që do të prehen në varrezat e Dëshmorëve”, tha Rama
Edhe Ministri Thaçi vlerësoi këtë veprim që do të ndërmarrin të dyja qeveritë.
“Sot është një ditë e veçantë për Kombin shqiptar sepse konfirmojmë mendimin e dy qeverive me idenë e zotit Rama që eshtrat e Boletinit të prehen në Vlorë, në qytetin e Pavarësisë, ndaj sot jemi këtu bashkë si dy qeveri, me vendimin edhe të familjes Boletini me itinerarin që vetë Isa Boletini e bëri për t’ju bashkuar idealit, qëllimit të pavarësisë së trojeve shqiptare për t’ju bashkuar Ismail Qemalit. Edhe sot do të dërgojmë mesazhin më të mirë për të ardhmen e kombit. Më 10 qershor do të jemi së bashku, Shqipëria Kosova, Presheva, shqiptarët e Maqedonisë, Ulqini. 10 qershori do të dërgojë mesazhin e një perspektive bashkuese
dhe integruese për kombin shqiptar. Do jetë një organizim madhështor. Falënderoj familjen Boletini”, u shpreh Thaçi.
