Donald Trump shfaqet përçmues dhe ironik ndaj Greta Thunberg dhe fjalimit të saj mocionues në Kombet e Bashkuara.
“Duket një vajzë shumë e lumtur dhe e projektuar drejt një të ardhmeje të shkëlqyer”, shkruan presidenti amerikan në Twitter duke shoqëruar komentin ironik me një video të fjalimit të aktivistes suedeze.
Gjatë samitit për Klimën në Nju Jork, përpara Asamblesë së Përgjithshme të OKB-së, Greta Thunberg iu drejtua liderëve botërorë në lot duke i akuzuar se i kanë vjedhur ëndrrat dhe fëmijërinë me premtime boshe.
Më pas në një zhvillim tjetër, aktivistja suedeze e shigjetoi Trumpin me një vështrim, i cili u kap me kamera dhe bëri xhiron e botës.
Greta Thunberg hapi punimet në Asamblenë e Përgjithshme të 75 të Organizatës së Kombeve të Bashkuara në Nju Jork, me kritika të forta për të pranishmit.
Përballë liderëve më të rëndësishëm të globit ajo tha se ata kanë dështuar në përpjekjet për të luftuar ndryshimet klimatike: “Unë nuk duhej të isha këtu, por në shkollë, në pjesën tjetër të oqeanit. Sërish ju vini tek ne të rinjtë dhe kërkoni shpresë. Si guxoni? Ju më keni grabitur ëndrrat dhe fëmijërinë time me fjalë boshe, dhe prapë jam nga fatlumët. Njerëzit po vuajnë, po vdesin, i gjithë ekosistemi po shembet”.
Rreth 60 liderë nga e gjithë bota marrin pjesë në takimin njëditor të organizuar nga Sekretari i Përgjithshëm i OKB-së, Antonio Guterres. Gjatë këtij eventi, ai mbajti dhe një fjalim për klimën, që ngjasonte me një autokritikë: “Natyra është e inatosur. Mashtrojmë veten nëse mendojmë se mashtrojmë natyrën, pasi natyra gjithmonë godet mbrapsht. Në të gjithë botën, ajo po godet furishëm”.
Ndërkohë, në selinë e Kombeve të Bashkuara mbërriti dhe Presidenti amerikan, Donald Trump. Momenti i hyrjes së kreut të Shtëpisë së Bardhë përkoi me atë të aktivistes suedeze Thunberg, e cila e vështroi atë nga larg.
