Arti i vjedhur dhe vepra antike nga Iraku, që asnjëherë më parë nuk janë ekspozuar jashtë vendit, do të paraqiten në pavijonin e këtij shteti në edicionin e sivjetmë të Bienales së Venecias.
Bienalja bashkon artistët më të mirë ndërkombëtarë në një vend dhe është një prej ngjarjeve kryesore të artit me ekspozitën kryesore dhe pavijonet e shteteve pjesëmarrëse.
Këtë vit Pavijoni i Irakut, i quajtur “Archaic”, do të përfshijë artefakte mjekësore, statuja, lodra dhe ibrikë.
Në mesin e tyre ka aso që janë deri në 7 mijë vjet të vjetra. Veprat antike vijnë nga Muzeu Kombëtar i Irakut, i cili ishte plaçkitur pas invazionit amerikan në vitin 2003 dhe qëndroi i mbyllur deri në vitin 2015, kur u rihap me ceremoni, raporton NYT, transmeton “Koha Ditore”. Disa prej veprave të vjedhura janë rikthyer, dhe një numër i tyre do të shpalosen në pavijon.
Një vepër e re nga artisti belg, Francis Alys, do të jetë pjesë e ekspozitës, ashtu sikurse edhe vepra nga artistët bashkëkohorë duke përfshirë Sherko Abbas, Sadik Këaish Alfraji dhe Ali Arkady.
Fondacioni “Ruya”, organizatë joqeveritare e fokusuar në trashëgiminë kulturore të Irakut, ka organizuar “Archaic”, derisa është kuruar nga Tamara Chalabi dhe Paolo Colombo. Bienalja e Venecias do të hapet në muajin maj dhe përveç këtij prezantimi do të ketë edhe ngjarje të tjera që ia vlen të përmenden.
Njëra prej tyre është paraqitja e 120 artistëve, të cilët do të ekspozojnë punimet e tyre në ekspozitën qendrore “Viva Arte Viva”. Kuruar nga Christine Macel, ekspozita do të sjellë vepra nga emra të mëdhenj, siç janë Lee Mingwei, Olafur Eliasson, Frances Stark dhe regjisori e artisti John Waters, i cili është i njohur për filmat “Hairspray” dhe “Pink Flamingos”.
Një ngjarje tjetër e cila do të zërë vend këtë vit në Bienale është edhe paraqitja e artistit Egill Sæbjornsson nga Islanda, i cili ka marrë përsipër që të bëjë art për pavijonin e shtetit të tij. Këtë javë ai ka bërë të ditur se figura folklorike Ugh e Boogar do të jenë pjesë e ekspozitës. Informacione të tilla po vijnë rregullisht falë llogarisë zyrtare të pavijonit të Islandës në “Instagram”.
Mark Bradford, piktor amerikan, veprat abstrakte të të cilit janë shpalosur në muzetë prej Ëalthamit deri në Shangai, do të përfaqësojë Shtetet e Bashkuara të Amerikës. Për paraqitjen e tij në pavijon, Bradford është duke nisur një projekt këtë pranverë përmes së cilit do të ndihmojë të burgosurit e Venecias me veprat që i bëjnë në mungesë lirie.
Giorgio Andreotta Calò, Roberto Cuoghi dhe Adelita Husni-Bey — tre artistë italianë të cilët punojnë në mediume të ndryshme – do të përfaqësojnë Italinë në pavijonin e kuruar nga Cecilia Alemani.
Muzeu “The Accademia” në Venecia do të prezantojë ekspozitë madhore nga piktori amerikan Philip Guston. Është një prej qindra ngjarjeve artistike në këtë qytet në kohën kur mbahet Bienalja, përgatiti Express. (b.an)
