Ipad-i, droga dhe Facebook-u/ 24 orë nga jeta e doktorit Nga Flogert Muça
“Sharjet janë argument për ata që nuk kanë të drejtë”
Jean-Jacques Rousseau (Zhan Zhak Ruso)
Mora shkas nga vërtetësia e asaj që thotë Rusoi për të vijuar më tej me atë që shohim e lexojme çdo ditë ne mediumet sociale, blogje, gazeta e gjithçfarë website-sh Online. Çdo ditë e më teper po merr vëmëndje “Bota Online”, e çdo ditë e më tepër po ashtu politikanët e kanë kuptuar se mënyra më e shpejtë e komunikimit me popullin është nëpërmjet mediumeve si Facebook, Twitter (pak Instagram sepse tek ne gjithçka vjen vite me vonesë). Të enjteve Ipad-i i thotë të gjitha në parlament (pavarsisht vërtetësisë), ndërsa ditët e tjera të javës, na “ndin” facebook-un. Paskëtaj, gjithçka thuhet në keto mediume, derdhet vrullshëm nëpër gazeta, e “statusi” merr dhenë sa hap e mbyll sytë.
Por, ku po shkon ky komunikim? Sa po e konsumon shoqëria? Çfarë po konsumon shoqëria shqiptare nga bota online? Kush është bërë “havale” për lexuesin online? Kush disinformon sot e mot Online? Cili formëson shije regresive për shoqërinë? Kush ethyen etikën ? Të gjitha këto pyetje e gjejnë përgjigjen nëse analizojmë gjuhën e përdorur nga politikanët, reagimet ndaj saj nga lexuesit Online dhe pasojat në shoqëri nga ajo ç’ka kjo gjuhë injekton. Po të përqëndrohemi tek politika, të cilën aq shumë e konsumojmë ndaj do e kemi më të lehtë të analizojmë. Këtë s’do e shohim në kontekstin politik, sepse populli e ka dhënë verdiktin e tij, por do e shohim në rrafshin moral dhe psikologjik që përcillet nga komunikimi i politikanëve.
Rasti i parë që vlen për tu parë e analizuar është ai i ish kryeministrit e tani deputet, Sali Berisha. Para afro dy vitesh, aq shumë e akuzonte Edi Ramën që përdorte twitter, saqë në një moment u duk sikur Berisha ishte kundër gjithë botës Online. Në fakt, edhe pse kundër gjithë botës ai mund të jetë në shumë aspekte, s’mundi ti bëjë ballë tundimit për të patur dhe ai një profil në rrjetin me te madh social, Facebook. Ndoshta në fillim e detyruan në fillim specialistët e tij amerikanë të komunikimit, por sot s’ka asnjë dyshim që është pasioni i tij më i madh. S’ka asnjë rëndësi si hyri në botën OnlineBerisha, në këtë botë kaq të panjohur për të deri dje, por padyshim ka rëndësi ti “tërhiqet” pakëz xhaketa nga ne të rinjtë kryesisht dhe shoqëria përgjithësisht për gjuhën që po përdor në komunitetin me të madh online.
Natyrisht, sheshi i duelit të Berishës është parlamenti, tek i cili Berisha nxjerr tanimë Ipad-in për të lexuar mesazhe e treguar video, a thua se kjo është një lojë kush ka 3G më të shpejtë.
Opozita ka të drejtë të bëj dhe protesta, pasi edhe pse kjo opozitë sot, dje në pushtet (ia lëmë drejtësisë ta gjykojë siç duhet) e vrau shpirtin e protestës më 21 janar të 2011-ës. Por, përpos gjithë të drejtave që i jep vëndi i deputetit opozitar, s’ka asnjë të drejtë (të paktën morale) të mbjelli “luftë” sociale.
Pse duhet parë me vëmendje rasti Berisha? Cili është interesi për ta ndjekur si rast? Pse duhet t’i hiqet nga duar Ipad-i?
Për t’ju përgjigjur të gjithë këtyre pyetjeve, unë kalova në faqen e tij në facebook, pashë me radhë të gjithë postimet e tij. Pasi i pashë me kujdes, vura re disa fjalë kyçe që gjendeshin në çdo postim të tijin. Ishin fjalët që nga goja e doktorit i kemi dëgjuar që nga viti 1990-2013. Ishin ato fjalët kyce që ndjekin jetën e një njeriu që ose është ushtar i ndonjë beteje fatale, ose padiskutim një fatalitet në jetën e tij e ka bërë të bëhet posesiv. Në çdo status të Sali Berishës fjalët : “Drogë, bombë, krim, Molotov, dinamit, mafie, eksploziv, dhune, gurë, hunj, puç, burg, tritol, bastisje, krim i organizuar, vrasje,……. !”
Stisjet e tij s’kanë fund, por unë do doja t’ju citoja një koment që dikush kishte lënë në facebook-un e Berishës : “ Lëreni në marrinë e tij Atë dhë Ata që ai përdor si ushtarë, pasi vetëm kështu, epitetet tuaja do jenë të realizuara në detaj”!
Ushtarët nga ana tjetër, janë po ata “revolucionarët” e fryrë nga politika e tij e gjuha e tij Virozë. Shkak i gjithë kësaj rrëmuje mediatike, që popullin e lodh është sërisht problemi më i madh i gjithë botës Online tek ne; i porsardhuri Sali Berisha. Ai kudo shkon bën rrëmujë. Kjo na bën të mëndojmë se ai këtë e bën për një arsye shumë të thjeshtë. Ndoshta është për të humbë gjurmët nga të vërtetat e hidhura që ka fshehur gjer dje. Në fakt, edhe rrjetet sociale kanë dhënë kontributin e tyre për t’i nxjerrë në pah. Ndoshta po hakmerret ndaj rrjeteve sociale që i nxorrën shumë të qena të fshehura, e po rrjetet sociale ishin ato që s’i nënshtroi dot kurrë. Nga ana tjetër, aq shumë të habisin, ata që i mbajnë lojën padronit që flet nga “froni” i facebook-ut dhe nga gëzimi që ka 3G, sa edhe sikur të të kenë të drejtë, s’kanë asnjë argument që të mund t’ju besosh se njerëzit online meritojnë një dhunë të tillë psikologjike e gjuhësore.
Gjuha e dhunës duhet shmangur, për të arritur më së pari një paqe sociale. Mos kini asnjë merak, sepse Berisha nga zyra e tij luksoze prej nga merr energjitë për të enjten e Ipad-it, ju vëzhgon… na vëzhgon.
