Një aktivitet ndërkombëtar që pritet të mbahet në Jalë krijoi ditën e djeshme përplasjen e radhës mes LSI dhe PS. Internacionalja e të Rinjve Socialistë (IUSY) do të festojë 110-vjetorin e themelimit pikërisht në Shqipëri ditën e shtunë, ndërkohë që në të do të marrin pjesë edhe vendasit.
Të rinjtë e Lëvizjes Rinore për Integrim dhe Forumi Rinor Eurosocialist janë mikpritësit e aktivitetit të madh njëkohësisht edhe si anëtarë të IUSY-t. Debati i një dite më parë në fakt kishte të bënte se cili ishte organizatori i vërtetë, LRI apo FRESSH. Një klimë tensionesh kjo që u përcoll edhe te të rinjtë e forumeve.
Por çfarë paralajmëroi vetë IUSY? Përmes një deklarate në orët e vona të mbrëmjes së të martës, Internacionalja ndërhyri për të sqaruar situatën duke tentuar t’i japë fund përplasjes mediatike në Shqipëri. Por nëpër rraeshtat e deklaratës organizata më e madhe e të rinjve të majtë paralajmëron edhe një ‘përballje’ Rama-Meta.
“Eventi mbahet nga LRI dhe mbështetet nga FRESSH dhe Partia Socialiste. Në festival do të jenë të pranishëm Presidenti i zgjedhur Ilir Meta dhe Kryeministri Rama. Në mediat shqiptare ka pasur disa keqkuptime, por që nuk e zbehin aspak klimen e organizimit” – tha dje IUSY.
Datat 15-20 Korrik, ditë këto kur do të mbahet aktiviteti, do të përcaktojnë nëse Rama dhe Meta do t’ia japin dorën njëri-tjetrit sërish pas disa muajsh, qoftë edhe për hir të ditëlindjes së IUSY-t. /javanews/a.r
