Opozita paralajmëron intensifikim të protestave pas tubimit të 13 prillit. Në një intervistë për A2 CNN, nënkryetari i PD, Edmond Spaho tha se demokratet do përdorin çdo mjet për të mos lejuar mbajtjen e zgjedhjeve fasadë në 30 qershor.
Pas tubimit 13 prillit, paralajmërimi i opozitës është për intensifikim të protestave. Përkundër qëndrimit të kryeministrit Edi Rama, pikërisht ditën e protestës, se zgjedhjet do të mbahen në 30 qershor, nënkryetari demokrat, Edmond Spaho thotë se opozita do te përdorë çdo mjet për të mos lejuar zgjedhje fasadë.
“Zgjedhje në qershor nuk ka për të pasur. Fakti që po zhvillojmë protesta qytetare tregon se të gjitha format e mundshme, në varësi të zhvillimeve politike mund të merren në konsideratë”, tha ai.
Spaho i kërkon edhe faktorit ndërkombëtar të parandalojë përshkallëzimin e situatës.
“Duhet të parandalojë përshkallëzimin e situatës dhe përsëritjen e skenarëve, të cilët asnjeri nuk ka dëshirë të shfaqen”, u shpreh Spaho.
Me këtë, ai la të nënkuptohet dhuna.
Sekretari për marrëdhëniet me jashtë në PD, Gert Bogdani, ishte i ftuar në “Dita Jonë” nga ku u shpreh se Partia Demokratike mund të regjistrohet në zgjedhjet vendore, duke i qëndruar kushtit që Rama të largohet, por duke i dhënë vetes hapësirë dhe kohë.
“PD e ka bërë të qartë se nuk mund të ketë zgjedhje me zotin Rama Kryeministër, i ka dhënë provat se zgjedhjet i vjedh”.
Ju keni vënë kushtet tuaja, por çfarë jeni të gatshëm të lëshoni? A jeni ju të gatshëm të gjeni një kompromis?
Gert Bogdani: Të marrim pjesë në zgjedhje dhe të vazhdojmë rrugën siç duhet të jetë në një Shqipëri normale dhe në një sistem normal demokratik.
A do të ishte regjistrimi në zgjedhjet lokale ndoshta një shprehje e këtij vullneti?
Gert Bogdani: Besoj se po nëse do të jenë në tavolinën e diskutimit dhe këto diskutime shkojnë mirë, regjistrimi do të ishte një shprehje e vullnetit. Patjetër që kompromisi është shumë i rëndësishëm dhe kompromisi zgjidh krizat.
