Johan Ndisi, ambasadori i Suedisë në Tiranë tha se miratimi i reformës në drejtësi është një hap i rëndësishëm për vendin, duke nënvizuar se kjo do të rrisë besimin e investitorëve.
Ambasadori theksoi se vendi i tij mbështet integrimin e Shqipërisë për në Bashkimin Evropian.
“Suedia është një mbështetëse e fortë e integrimit të Shqipërisë. Të gjithë ne po presim raportin e javës tjetër për vendin tuaj dhe besoj qe të gjithë shpresojmë që të ketë vlerësim me nota pozitive. Ajo që dua të theksoj është se marrëdhëniet e Shqipërisë me Suedinë janë të qëndrueshme, megjithatë duhet të ketë dialog dhe shpresojmë që Shqipëria te integrohet ne BE.
Nga qyteti i Shkodrës ku zhvilloi një takim me Voltana Ademin, Ndisi nuk preferoi të komentonte vendimin e Gjykatës Kushtetuese për pezullimin e ligjit të Vettingut”, tha ai.
“Nuk dua të komentoj sistemin e drejtësisë në vend, por dua të them se Komisioni i Venecias që është përfshirë në proces do të mbikëqyrë ecurinë e reformës në drejtësi. Megjithatë hapat që janë ndërmarrë janë shume të rëndësishëm për vendin, pasi u shërbejnë shumë qytetarëve shqiptare. Mbi të gjitha u japin besim investitorëve të huaj dhe shërbejnë për integrimin në familjen evropiane”, theksoi ndër të tjera./express/a.k
