Kryeministri Edi Rama e ka cilësuar Shqipërinë në gjendje lufte sa i përket informalitetit të bizneseve, në kuadër të nisjes ditën e sotme të operacionit të paralajmëruar.
Sipas Kryeministrit Shqipëria është në gjendje lufte për sa i përket informalitetit që është rrënjosur në vend. Ai tha se qeveria e tij nuk do të ndalet deri në çrrënjosjen e fenomenit të evazionit fiskal, ndonëse rruga është mjaft e vështirë.
Sipas kryeministrit, ky do të jetë kryeprioriteti i qeverisë që ai drejton në këto 300 ditët e para, ndërsa shtoi se bilancet e këtij operacioni do të bëhen sistematikisht çdo ditë.
“Aksioni për zhdukjen e evazionit fiskal, është një rrugë mjaft e vështirë dhe të tjerët para nesh dështuan sepse menduan për zgjedhjet e radhës. Kështu u rrënjos në mendjen e shqiptarëve ideja se ky vend nuk bëhet dot. Sot bien dakord të gjithë, që ka filluar që të vijë ‘era’ shtet, por duhet një punë kolosale dhe pjesë e rëndësishme e kësaj është operacioni që nisëm sot, një operacion në mbrojtje të konsumatorit dhe biznesit që paguan taksat dhe kundër fenomenit të hajdutërisë. Gjatë këtyre 21 muajve të fundit është konstatuar një rritje e madhe e kuponëve tatimorë dhe uljes së punës së zezë. Ende nuk ia kemi dalë, por është faza kur kalojmë në një fazë të re, në luftën kundër informalitetit. Me këtë fenomen, Shqipëria është në gjendje lufte”, u shpreh Kryeministri.
