Në aksionin e paralajmëruar për të nisur më 1 shtator, do të angazhohen një sërë strukturash shtetërore, përfshirë këtu Policinë e Shtetit dhe Prokurorinë.
Kryeministri Rama në mbledhjen e Këshillit Ekonomik Kombëtar u shpreh se:
“Lufta ndaj informalitetit do të jetë kryefjala e 300 ditëshit të tretë qeverisës dhe do të harmonizojë veprimet mes doganave, tatimeve, Inspektoriatit të punës dhe Policisë së Shtetit, në koordinim dhe bashkëpunim me Prokurorinë, konsumatorët dhe biznesin”
Për nga mënyra e zhvillimit, aksioni do të jetë i ngjashëm me të tjerët që ka ndërmarrë qeveria deri më tani.
“Kemi një plan të mirëstudiuar për t’iu përgjigjur me efektshmëri dhe qëndrueshmëri afatgjatë në fitoren e kësaj sfide. Operacion do të jetë i ngjashëm në thelb dhe në efekt me atë të energjisë, mbrojtjes së territorit, ndarjes në sistemin e arsimit mes atyre që ushtrojnë aktivitet të ligjshëm si subjekte private dhe atyre që deri dje e kishin kthyer sistemin në një hapësirë abuzimi dhe tregtie me diplomat”, tha Rama.
Kryeministri u kujdes të theksojë se lufta kundër informalitetit nuk duhet parë si një goditje për biznesin e ndershëm, përkundrazi, raporton Top Channel.
“Është një aksion për të bërë të mundur që më të mëdhenjtë të veprojnë brenda kornizës së ligjit dhe gjithkush të fitojë atë që i takon dhe jo të përfitojë duke vjedhur atë që i takon shoqërisë, e cila duhat ta marrë mbrapsht përmes investimeve dhe shërbimeve të shtetit”, u shpreh kryeministri.
Kreu i Qeverisë u bëri thirrje konsumatorëve të ndërgjegjësohen dhe të kërkojnë kuponin tatimor, si një kontribut për të patur më shumë investime dhe rritje rroga. Ai tha se ne terren do te operojne 600 grupe kontrolli, prej te cilave priten dhe rezultatet pozitive te aksionit mbarekombetar.
