Pas zërave kritikë të shtuar kohët e fundit për një ekonomi gjithnjë e në rënie të Shqipërisë, si dhe pas paralajmërimit të aksionit për bizenset informale, Kryeministri Edi Rama ka theksuar edhe një herë se ky operacion do të sjellë një rritje të mëtejshme të të ardhurave në buxhetin e shtetit.
Përmes një postimi në rrjetet sociale, kreu i qeverisë bën të ditur se falë kësaj lufte frontale, do t’i jepet fund vjedhjes së konsumatorit dhe konkurencës së pandershme të bizesneseve.
“LUFTA E PËRBASHKËT ME INFORMALITETIN DO TË NA JAPË MUNDËSINË TË RRISIM RROGAT DHE ULIM TAKSAT. Shembujt dhe shifrat ndihmojnë për të kuptuar se sa shumë kemi bërë në 20 muaj në luftën kundër informalitetit, por edhe se sa e madhe është mundësia që na jep më tutje një luftë frontale, e përbashkët, e çdo qytetari që do rritje rrogash dhe e çdo biznesi që do ulje taksash, kundër atyre që vjedhin konsumatorin duke mos dhënë kuponin fiskal për atë që shesin si edhe atyre që u bëjnë konkurencë të pandershme biznesve të rregullta duke shmangur taksat.” shkruan Rama ndërsa ka postuar foton e fundit për të ilustruar me shembull konkret.
