Hetimi për përplasjen e disa personave me policinë në hyrje të te tregut të Elbasanit rikthehet sërish në Prokurorinë e Krimeve të Rënda. Prokuroria e Elbasanit ka ridërguar për hetim pranë Prokurorisë për Krime të Rënda aktet për vijimin e hetimeve për Enea Bekteshin dhe Kelmend Xhaferrin. Këta persona dyshohet se janë përgjegjës për përplasjen me efektivët e policisë.
Prokuroria e Elbasanit e ka rikthyer dosjen te Prokuroria për Krimet e Rënda për shkak të moskompetencës së shpallur nga ajo Prokurori, por nuk është konfirmuar në Gjykatën e Krimeve të Rënda në bazë të ndryshimeve të reja të Kodit të Procedurës Penale.
Ndërkohë për personat e tjerë, të përfshirë në mënyrë indirekte në këtë ngjarje hetimi po vijon nga Prokuroria e Elbasanit. Për këta persona me kërkesë të Prokurorisë së Elbasanit, gjykata e Elbasanit konfirmoi masën ‘Arrest me Burg”.
Në mbrëmjen e 18 shtatorit, Enea Bekteshi ka qenë në timonin e makinës së blinduar që goditi mjetin e polcisë në hyrje të tregut Agroushqimor të Elbasanit. Bekteshi është shprehur se ka qenë nën efektin e alkoolit dhe nuk i ka bërë veprimet me vetëdije raporton Shqiptarja.
