Gjykata e Lartë ka vendosur të prishë vendimin e Gjykatës së Posaçme të Apelit, që e kthente për rigjykim dosjen e inceneratorit të Fierit në Shkallën e Parë. Gjykata e Lartë vendosi që kjo dosje të rishqyrtohet në Apel, me një tjetër trupë gjykuese.
“Prishjen e vendimit nr. 55 (87-2024-383), datë 19.12.2024, të Gjykatës së Posaçme të Apelit për Korrupsionin dhe Krimin e Organizuar, dhe kthimin e çështjes për rishqyrtim pranë asaj gjykate, me tjetër trup gjykues”, thuhet në vendim.
Më 19 dhjetor të 2024, Gjykata e Posaçme e Apelit vendosi ta rikthejë për rigjykim dosjen për inceneratorin e Fierit. Kjo shënonte dhe herën e parë që Shkalla e Dytë e Gjykatës së Posaçme kthente një vendim të miratuar nga Shkalla e Parë.
Kujtojmë se më 25 shtator të 2023-t, Shkalla e Parë dënoi me 6 vite e 8 muaj burg ish-ministrin e Mjedisit Lefter Koka, me 2 vite e 8 muaj ish-deputetin Alqi Bllako, ndërsa 10 të pandehur të tjerë morën dënime të ndryshme. Për këtë dosje u shpallën të pafajshëm 3 të pandehur.
Hetimet për inceneratorin e Fierit u mbyllën në Dhjetor 2022. Sipas SPAK për inceneratorin e Fierit u paguan 4 milionë Euro për punë që nuk u kryen asnjëherë, ndërsa 60 milionë Lekë është dëmi i shkaktuar në buxhetin e shtetit në skemën e mashtrimit. Të gjithë të akuzuarit mohuan akuzat e SPAK dhe kërkuan pafajësi në të dyja shkallët e gjyqësorit.
