Inceneratorët/ Tabaku thirrje SPAK: Heto personat me pushtet, duke filluar me Edi Ramën

Kryetarja e Komisionit Hetimor për inceneratorët, Jorida Tabaku ka reaguar pas bojkotit që mazhoranca i bëri sot këtij komisioni. Në një deklaratë për mediat, deputetja e PD u shpreh se me këtë veprim PS tregoi se i del në mbrojtje, jo vetëm Lefter Kokës, por edhe personave të tjerë të përfshirë në aferën e inceneratorëve, Klodian Zotos, Stela Gugallijat dhe Koldian Mertirit.

Jorida Tabaku i bëri thirrje SPAK që hetimet të shtrihen tek personat me pushtet, duke filluar nga Edi Rama.

Po ashtu Tabaku u shpreh se institucionet shtetërore refuzojnë të përgjigjen, por nese kjo vazhdon, ajo u shpreh se do të bëjmë padi penale.

“Është për të ardhur keq që PS bojkoton mbledhjen e komisionit hetimor sot pikërisht kur drejtësia i ka dhënë mundësi parlamentit të vazhdojë edhe më tej me planin e hetimit.

PS premtoi që nuk do ketë mbrojtje politike për askënd, përfshirë në këtë aferë ndërkohë që sot mbrojta politike po jepet duke bojkotuar.

Komisioni i inceneratorëve nuk flet pa fakte, madje ky institucion dhe SPAK po i afrohen të vërtetës.

Ndërkohë që Lefter Koka është i pari që duhet të shkojë para drejtësisë, PS është rreshtuar në mbrojte personale të Lefter Kokës, Klodian Zotos, Stela Gugallia dhe Klodian Mertirit.

Me bojkotin e saj PS po përpiqet të mbrojë edhe persona të tjerë politikë të përfshirë në këtë aferë.

Në padinë e dorëzuar në SPAK ne kemi kërkuar që hetimit të vazhdojë me Edi Ramën si person i lidhur me aferën e inceneratorëve, me Arben Ahmetaj ministrin përgjegjës dhe që ka njohje me  pronarët e inceneratorëve, Damian Gjiknurin që ka dhënë inceneratorin e Tiranës, me Qazim Sejdinin, Armando Subashin dhe Erion Veliajn.

Pa drejtësi për këtë persona SPAK dhe komisioni hetimor nuk kanë për ta kryer punën e tyre.

Unë sot e kuptoj se pse institucionet shtetërore refuzojnë të përgjigjen, ne do të bëjmë padi penale nëse kjo vazhdon.

I bëj thirrje SPAK që të vazhdojë dhe të shtrijë hetimet tek personat me pushtet. Lefter Koka është pa pushtet, ata qe jane me pushtet dhe mandat deputeti nuk po hetohen”, tha Tabaku.

g.kosovari