Është inauguruar në Bashkinë e Vorës zyra e re e punës. Kanë qenë të shumta kërkesat e punëkërkuesve dhe bisnesit për të patur më afër shërbimin e pikëtakimit mes kërkesës dhe ofertës ndërsa mësohet se janë 37 mijë banorë në këtë zonë, me mbi 500 biznese.
Me inagurimin e kësaj zyre, nis faza e dytë e shtrirjes së Zyrave të punësimit në bashkitë e vogla, deklaroi drejtori i Shërbimit Kombëtar të Punës Artur Micko, i cili shtoi se banorët e Vorës deri tani i drejtoheshin zyrave të punës në Tiranë.
Prefekti i Tiranës, Sadi Vorpsi, tha se me hapjen e zyrës së punësimit në Vorë, plotësohet me zyra pune qarku i Tiranës, duke i bërë një shërbim të madh komunitetit për këshillim, informim dhe akses më të madh për punëzënien.
“Zyra e Punës, që ne çelim, duhet parë si një pikëtakimi mes punëdhënësit dhe punëmarrësit. Ky nuk është vetëm një vend ku qytetarët vijnë dhe kërkojnë punë, por edhe një ambient ku biznesi duhet të adresohet dhe të kërkojë krahun e punës. Unë besoj se qytetarët e Vorës i kanë të gjitha kapacitetet profesionale për t’iu përgjigjur kërkesës së tregut” – tha Vorpsi.
Nga ana tjetër, Blendi Klosi deklaroi se të 61 bashkitë në vend, do të jenë të pajisura me zyra pune brenda 2016.
