Këshilli për Rregulloren, Mandatet dhe Imunitetin zhvilloi sot një mbledhje të gjatë dhe me debate të zgjeruara lidhur me kërkesën për imunitetin e deputetes Belinda Balluku. Pas diskutimeve, Këshilli vendosi të mos dalë ende me një përfundim, duke kërkuar më shumë kohë për shqyrtimin e çështjes.
Gjatë mbledhjes, anëtarët e Këshillit u ndalën te aspektet procedurale, precedenti parlamentar dhe nevoja për një vlerësim të kujdesshëm të kërkesës, duke theksuar se vendimmarrja nuk duhet të jetë e nxituar. Në këtë kuadër, u argumentua se çështje të tilla kërkojnë kohë të mjaftueshme për analizë të plotë, në respekt të rregullores së Kuvendit dhe standardeve parlamentare.
Në diskutime ndërhyri edhe kreu i grupit parlamentar të Partisë Socialiste, Taulant Balla, i cili solli në vëmendje precedentë të mëparshëm të Kuvendit. Balla kujtoi se Këshilli i Mandateve ka pasur raste kur ka marrë deri në 75 ditë kohë për shqyrtimin e një kërkese, duke përmendur konkretisht rastin e ish-ministrit Lulzim Basha, lidhur me çështjen e rrugës Durrës–Kukës.
Sipas Ballës, kërkesa në atë rast kishte mbërritur në Kuvend më 15 tetor 2007 dhe u votua në seancë plenare vetëm më 27 dhjetor 2007, çka dëshmon se Kuvendi ka ndjekur edhe më parë procedura të zgjatura në raste të ndjeshme dhe me peshë politike.
