Nga Ilva Tare
E di që shqiptarët janë duke dëgjuar premtime shumë më të rëndësishme se sa këto hallet e vogla të jetës së përditshme në muajin e fushatës, ndaj e mirëkuptoj cilindo që habitet me kërkesa minimale si kjo e administratorit të një pallatit. Por, kur të duhet të bësh pesë kate në këmbë në temperatura të larta me vajzën në krahë, pa llogaritur karrocën që duhet ngjitur dhe zbritur besoj se nuk ka shqetësim më të madh për cdo familjar që jeton në vendin e “mrekullive” elektorale të para 25 Qershorit.
Partitë politike në Shqipëri as gjatë kësaj fushatë nuk zhgënjyen me premtimet për përmirësimin e jetës së gjithsecilit sapo të mbarojnë zgjedhjet dhe të fillojë punë qeveria e re. Investime disa milionëshe, punësime të merituara, fund emërimeve partiake, institucione publike transparente dhe të pa korruptuara si dhe një seri të gjatë fjalësh të bukura, që nuk ka parti dhe qeveri që mund t’i realizojë në katër vitet e ardhshme. Dhe as kanë ndërmend në fakt ta bëjnë këtë.
Është e pashpjegueshme shkëputja që partitë politike kanë nga problemet e vogla të shqiptarëve, sikundër është e pakuptueshme gjuha për politikën makro, të arritjeve të mëdha, konkurrimin e Shqipërisë në tregun rajonal e shumë gjëra si këto, që nuk janë filozofi të arritshme në një mandat dhe as nga politikanë që mendojnë për pushtetin e nesërm. Arkitektë të një filozofie afatgjatë janë ata burra shteti që investohen me politikat e tyre për brezat e ardhshëm dhe vendi ynë nuk ka lejuar ende përfaqësimin publik të individëve të tillë.
Edhe kjo fushatë po shkon dëm me retorikë boshe dhe batuta që duket sikur duan të rivalizojnë humorin e “Cmendina Dublim”. Nëse do të dëgjoheshin me vëmendje disa kandidatë, që ja dolën për arsye që i dinë të gjithë, të jenë në listat e kryetarëve do të ishte dhe më e pavend shpresa se Parlamenti i ri do të freskohet me mendje të reja. Por, fatmirësisht as kandidatët nuk arrijnë dot të artikulohen qartë dhe as nuk i dëgjon njeri, fatkeqësisht.
Komunikimi politik i strategëve të fushatës për zgjedhjet e 25 Qershorit do të duhej të kishte marrë parasysh edhe hallet e vogla të votuesve të udhëheqësve të mëdhenj. Miratimi I ligjeve, pa garantimin e zbatimit të tyre është I pavlerë. Siguria e munguar për ushqimet që shiten në treg, certifikata dhe licensa të fabrikuara në laboratorë fiktivë, pamundësia për të marrë drejtësi, absurditeti I të jetuarit në komunitete indiferente përpara ligjit dhe detyrimeve që dalin prej tij e bëjnë Shqipërinë një vend të dështuar nga pikëpamja administrative, në nivel makro dhe mikro.
Ndaj, nëse kandidatët për deputetë dhe stafi i tyre i fushatës, do të trokiste në dyert e qytetarëve për t’i dëgjuar dhe jo për të propaganduar të parealizueshmet, votuesit do ta kishin më të lehtë kujt t’i besonin votën dhe veten në 25 Qershor. Duke filluar që nga unë, që edhe pas dy vitesh nuk kam administrator pë rt’u dhënë zgjidhje problemeve tek pallati ku banoj.
