Nga Alba Malltezi
Duket sikur një pjesë prej nesh nuk e ka kuptuar si duhet fitoren e Donald Trump si presidenti i 47 i Shteteve të Bashkuara të Amerikës. Disa prej nesh po nxitohen të dalin në sipërfaqe si antishtetarët më të përbetuar që Shqipëria ka parë ndonjëherë. Dikush po merr kurajon nga klandestiniteti si i kërkuar i drejtësisë të japë mesazhe të koduara dhe të faksifikuara. Dikush tjetër, nga i njëjti klandestinitet edhe të marrë pjesë nëpër mitingje elektorale, pavarësisht së është shpallur: Në kërkim!
Ka nisur një fushatë e ashpër për të hedhur “në turrën e druve” si në kohën e Mesjetës, të nëpunësve apo bashkëpunëtorëve të shoqërisë civile vetëm e vetëm se “mendohet të kenë përfituar fonde nga USAID”, ku dhe Usaid e Soros po anatemohen në Shqipëri si të ishin jo donatorët dhe nxitësit intelektualë të një shoqërie kryeulur e kurrizdërrmuar për dekada tranzicion, por sikur të ishin fondacione terroriste. Madje, këtë inat mediatiko-politik, i dukshëm se cilës anë i takon, nuk e kishim parë ndonjëherë as me terroristët më të përfolur në botë, me shkaktarët e gjëmave njerëzore në atdhe, apo me intrigantët më të talentuar të çështjeve antishqiptare.
Në të njëjtët orë që po ndodhin këto, e njëjta palë mediatiko-politike që po kryen rite Vudu rreth deklaratave të keqinterpretuara kundër ish Sekretarit Blinken, bën sikur nuk sheh, kupton dhe reagon ndaj një krimi të pandëshkuar në Gërdec, mbetur ende jetim në sytë e të gjithëve, edhe pse media investigative nuk resht së sjelli dokumente, fakte, dëshmi.
Ndërsa Shtetet e Bashkuara të Amerikës i kanë dhënë shansin të drejtohen nga Republikanët dhe nga Donald Trump, pa u betuar se do të shkatërrojnë vendin e tyre; në vendin tonë, individë që kanë punuar vetëm me hilet e mbulimit të ngjarjeve kriminale dhe të përvetësimeve, shpresojnë që kjo fitore në SHBA, të anulojë shtetbërjen në Shqipëri, të anulojë atë që me shumë mundime BE e SHBA bashkë kanë nisur të ndërtojnë: Drejtësinë e re, si një mundësi që edhe në Shqipëri, pushtetet të kontrollohen e të kontrollojnë njëri-tjetrin në një balancë dhe harmoni që vetëm Demokracia e vërtetë e lejon.
Nëse Donald Trump ka mik të ngushtë dhe bashkëpunëtor Elon Musk, një gjeni-miliarder, nuk do të thotë se nën ombrellën e tij ka vend për njerëz që në mes të Bulevardit të Dëshmorëve vranë shqiptarë, apo që hodhën një fshat të tërë në erë vetëm e vetëm që të vinin disa miliona mënjanë.
As Trump, as Elon Muks dhe asnjë Republikan nuk akuzohen për krime kaq të rënda e të pandëshkuara akoma në vendin tonë. Askush në SHBA nuk ka gjë të përbashkët me antishtatarë ballkanas që mbajnë peng edhe shpresën e disa bashkëatdhetarëve tanë.
