Ka zgjatur rreth tre muaj aventura e Evi Kokalarit në Shqipëri, teksa sot ka njoftuar tërheqjen drejt SHBA-ve duke e lënë batall Sali Berishën dhe shokët e tjerë që bëri këtu. Siç thotë edhe vetë, Kokalari po largohet për t’iu përkushtuar jetës private që ka lënë komplet pas dore, një sakrificë kjo tepër e madhe për disa njerëz që s’i njihte gjer në shtator. Por, ajo ka lënë një shteg hapur duke u shprehur se do të vijojë të kontribuojë me opinione dhe analiza në rrjete sociale. Pak a shumë një lloj pune që e bëjnë të gjithë shqiptarët në Facebook.
Por largimi i zonjës Kokalari nga Komisioni i Rithemelimit të PD nuk përbën mister, pasi dita-ditës ajo po i mungonte axhendës së Berishës. E pra, ky largim më tepër sesa mister është një ‘humbje e madhe’ për PD-në kur mendon zotimet e saj nëpër ‘Foltore’. Fjala bie, Kokalari s’la qytet pa u betuar se çështjen e Lulzim Bashës do ta çonte në Kongres dhe sa të ishte ajo gjallë, ai nuk do të merrte kurrë vizë amerikane.
Së dyti, e kush mund ta harrojë premtimin për modernizimin e Partisë së Berishës, që ajo do ta binjakëzonte me atë Republikane të SHBA? Madje ajo është i vetmi person që ka deklaruar se e ka parë tashmë ‘Kushtetutën e re të PD’ dhe është identike me atë të Partisë Republikane Amerikane.
Përtej të gjithë këtij grotesku që na dhuroi, ajo po lë pas edhe ca rrëmuja të vogla. Të mos harrojmë se në tre muaj nuk la studio pa u ankuar se po e ofendonte kushdo që mendonte kundër. Në disa raste hapi edhe gjyqe ndaj deputetëve të PD-së për shpifje. Një deputeteje i përmendi divorcin për ta denigruar, e derisa mbërriti në derën e PD-së duke i rënë me shkelm. Pas aty hasi në ‘hundlesh’, iu hakërrye gazetarëve se po i rrezikonin jetën me kamerat që mund t’i binin mbi kokë.
Kjo është ‘humbja e madhe’ për PD-në, që premtoi si fillim fitoren e Trumpit në 2024 dhe heqjen e non-gratas së Berishës më pas. Një histori si e kllounit Otto Ëitte, që kur mori vesh së shqiptarët kishin mbetur pa zot, veshi një uniformë dhe erdhi bëri 5 ditë qejf si mbret i shqiptarëve. Pastaj kur e njohën, iku e iu kthye jetës si klloun në Vjenë.
/JavaNews/ A.Rada
