Kreu i PDIU-së i ka bërë një thirrje ish kolegut të tij çam Dashamir Tahiri, edhe pse javë më parë e cilësoi atë si një grek, për faktin se braktisi çështjen çame për t’ju bashkuar listës së PD-së në Vlorë.
Kreu i PDIU-së Idrizi ishte në Vlorë këtë të dielë në një takim elektoral, dhe nga atje ka hedhur akuza drejtuar Vangjel Dules, duke e cilësuar si zëdhënësi i Agimit të Artë, partisë neofashiste greke.
Si Dule ashtu edhe Dashamir Tahiri janë në të njëjtën listë kandidatësh në PD, e për rrjedhojë Idrizi i ka bërë thirrje këtij të fundit të largohet dhe t’i rikthehet shtëpisë së tij çame.
“Unë i bëj thirrje Dashamirit që të vijë në shtëpinë e vet se nuk i ka hije. Nuk del i pesti në PD. Për kë do i kërkoj votat për Dule çamin? Atyre që e kanë bërë këtë listë, t’ju vijë turp. Ik nga ajo listë Dashamir Tahiri, se do jesh i nderuar, nga ne dhe nga gjithë çamët”, tha Idrizi. /b.d
