Çështja çame është rikthyer në qendër të vëmendjes pas vizitës së kryeparlamentarit Ilir Meta në Greqi. Kryetari i Partisë për Drejtësi Integrim dhe Unitet Shpëtim Idrizi ka kritikuar sërish Metën nga foltorja e parlamentit, mbi qëndrimin e mbajtur nga kryeparlamentari gjatë vizitës në shtetin helen.
“I them kryetarit Meta, unë kuptoj shumë nga politika, besoj te kompromisi, aleancat fluide dhe llogaritë elektorale, por në politikë ka detyrime. Rezoluta e këtushme për shqiptarët e Çamërisë, është e detyrueshme, e të sotmes. Në Athinë për ju dhe kolegët ishte detyrim rezoluta e shqiptarëve të Çamërisë. Unë nuk fsheh habinë për gjuhën që zgjodhet në Athinë, se një ditë pasi mikëpritësi juaj shpalli armik të klasës komisionerin Hahn, shpresoja të shihja atje kryeministrin e 1999 kur vizitonte Athinën, ose kreun e LSI kur mbështeste tubimet për çështjen çame, besoj janë habitur edhe grekët për harrimin e një çështjeje që se harrojnë shqiptarët. Ju thoni ta lëmë të shkuarën dhe të shohim të ardhmen. Askush nuk u ndje, as ju as kolegët që ju shoqëronin. Do të ishte e udhës të kërkonit barrën e shqiptarëve të Çamërisë”, tha Idrizi referuar deklaratave të metës në Athinë.
Kryetari i PDIU-së Shpëtim Idrizi dha edhe një deklaratë në lidhje me ndërtimin e varrezave të ushtarëve grekë.
“Nëse nuk lejohen ndërtimet e varrezave të shqiptarëve të rënë në Çamëri. Asnjë arkëmort grek nuk do të ketë në Shqipëri. Betohem solemnisht”, tha ai.
Ai tha më tej se kjo çështje duhet të jetë prioritet dhe në fokus të gjithë shqiptarëve. Idrizi tha se për këtë çështje shprehu mbështetje edhe BE.
“Çështja çame është çështje e ditës. Dhe këtë e kuptoi edhe Komisioni Evropian. Nuk do ishte e rehatshme që Evropa të vendoste kapakun e harresës. Familja evropiane ndërtohet në bazë të së vërtetës. Ne jemi gati të falim, por nuk jemi kurrë të gatshëm që të harrojmë. Çështja shqiptare është e gjithë kombit, të gjithë duhet të shkundemi për çështjen e shqiptarëve të Çamërisë. Falë zotit ne nuk jemi vetëm. Brukseli na dha mbështetje”, tha Idrizi.
/a.m.
