Kryetari i PDIU-së propozon kthimin e listave të hapura zgjedhore, flet edhe për rikompozim të kabinetit qeveritar
Kryetari i PDIU-së Shpëtim Idrizi tha dje se do të rishikohet koalicioni me Partinë Socialiste. Kreu i PDIU-së foli edhe për reformën zgjedhore duke propozuar kthimin e listave të hapura zgjedhore. “Do të jenë forumet e PDIU-së për ta bërë këtë gjë për vendimmarrjen e nevojshme. Nuk e kuptoj pse Shqipëria duhet të jetë e ndarë në 12 qarqe pse jo dhe një zonë zgjedhore me lista të hapura”, tha Idrizi.
Duke komentuar marrëdhëniet me PS-në në koalicion, ai tha se PDIU është bashkudhëtare në qeverisje, por kritike e hapur e politikave të gabuara. Kryetari i PDIU, Shpëtim Idrizi, thotë se kritikat për qeverinë bëhen duke parë realitetin në sy dhe gjendjen ekonomike të shqiptarëve, ku sipas tij, vendi po kalon në depresion ekonomik dhe për këtë i tërheq vëmendje qeverisë, por politika më të ndjeshme sociale.
“Kemi një moment depresioni dhe humbje shprese jo vetëm nga politika shqiptare por edhe përsa i përket ekonomisë, drejtësisë dhe mungesës së shpresës. Këto gjëra nuk mund të mos i artikulojmë dhe është detyra e qeverisë që të thotë që gjendja është e tillë që ka qënë një keq paraardhës nuk mund të themi më i mirë apo më i keq se ai. Ne duhet të ndryshojmë katërcipërisht ambientin politik”, u shpreh Idrizi.
Idrizi i sygjeron kryeministrit të vlerësojë rikompozim e qeverisë, duke kërkuar që PDIU të jetë pjesë e këtyre ndryshimeve. Ndërsa ministria e diasporës është një projekt që u shërben shqiptarë jashtë kufijve shqiptarë dhe jo specifikisht PDIU. “Nuk ka qenë asnjëherë qëllim në vetvete për partinë për Drejtësi, Integritet dhe Unitet por ne kemi thënë që sa herë të ketë ndryshime duhet të ketë ndryshime në kabinetin qeveritar pra duhet të jetë një kompozim të qeverisë për shkak të peshës specifike pra grupit tonë parlamentar dhe kapaciteteve që ne kemi brenda partisë PDIU pse jo të përfaqësohej me një post ministror”, shprehet Idrizi. Ndërkaq, Shpëtim Idrizi theksoi se kryefjala e politikave të PDIU mbetet bashkimi kombëtar si një projekt i mundshëm./27.al/a.m.
